Ma shingrüyning su qurulushini kücheytish heqqidiki sözliri diqqet qozghidi

Uyghur aptonom rayonluq partkomning sékrétari ma shingrüy yéqinda özining xizmetke chüshkendin buyanqi “Tekshürüsh” pa'aliyetlirining bir qismi süpitide aqsu we qizilsu wilayetliride tarim deryasining su ishlirigha da'ir xizmetlerni közdin kechürgen hemde “Bash sékrétar shi jinpingning su ishliri heqqidiki yolyoruqlirini toluq izchillashturup, shinjang heqqidiki sözlirining rohini emelde körsitish” ni telep qilghan. Shuningdek su bayliqidin ünümlük paydilinip yuqiri süpetlik tereqqiyatqa képillik qilishni tekitligen.

Xitay hökümiti bashqurushidiki “Tengritagh” torining 24-maydiki xewiride éytilishiche, bu qétimqi tekshürüsh jeryanida ma shingrüy Uyghur diyaridiki su bayliqining barliq tereqqiyatlarning achquchi ikenlikini, buning muhit qurulushi we yéza igilikining aldinqi sherti ikenlikini alahide tekitligen.

Melum bolushiche, yéqinqi yillardin buyan xitay hökümiti Uyghur diyarini xitayning eng chong ishlepchiqirish bazisigha aylanduruwatqan bolup, shu qatarda bu jayning xitay üchün “Énérgiye ambiri” bolushtin bashqa yene “Ashliq ambiri” bolush rolimu barghanséri gewdilenmektiken. Nöwette wirus wabasi we gherb dunyasining iqtisadiy jazaliridin iqtisadiy jehette selbiy aqiwetlerge duch kéliwatqan xitay hökümiti Uyghur diyarini ashliq ishlepchiqirishtiki yéngi baza qilish arqiliq bu jehettiki ötkeldin ötüp kétishke urunmaqta, dep qaralmaqta. Mushu ehwalgha asasen ma shingrüyning bu qétimqi sözliri ene shu xil chong weziyetning inkasi ikenliki algha sürülmektiken.