Ма шиңрүй, әдәбият-сәнәт вә иҗтимаий пән тәтқиқатини “җуңхуа миллити ортақ еңи” ни шәкилләндүрүшкә қаритишқа чақирған

Мухбиримиз әркин
2022.05.27
Share on WhatsApp
Share on WhatsApp

Хитайниң уйғур дияридики әң һоқуқлуқ әмәлдари ма шиңруй 26-май күни уйғур аптоном райониниң әдәбият-сәнәт, иҗтимаий пән тәтқиқат саһәсигә сөз қилип, әдәбият-сәнәт вә иҗтимаий пән тәтқиқат саһәсиниң “зор вә җиддий мәсилиләр” ни тәтқиқ қилиш вә һәл қилишта дәврниң чақириқиға аваз қошушини тәләп қилған. Униң ейтишичә, райондики әдәбият-сәнәт, иҗтимаий пән тәтқиқат саһәси тәтқиқат нишанини “җуңхуа миллити ортақ еңини шәкилләндүрүшкә ‍охшаш зор темиларға мәркәзләштүрүп, техиму көп салмиқи һәм қиммити бар тәтқиқат нәтиҗилирини яритиши керәк” икән.

Бу ма шиңрүйниң өткән йили уйғур аптоном районлуқ партком секретарлиқиға йөткәп келингәндин бери тунҗи қетим райондики әдәбият-сәнәт, иҗтимаий пән тәтқиқат саһәсигә уларниң тәтқиқат нишани тоғрисида йолйоруқ беришидур.

Хитай һөкүмити 2017-йили башланған чоң тутқунда мәзкур районниң әдәбият-сәнәт, иҗтимаий пән тәтқиқат саһәсидики ғоллуқ уйғур сәрхиллирини тазилап чиқирипла қалмай, уйғурларниң тарихий, мәдәнийити, әдәбият-сәнитигә аит китабларни “бөлгүнчилик” тәрғиб қилинған, дегән намларда бирдәк чәклигән. Бу саһәдики нурғун уйғур сәрхиллири лагер-түрмиләргә қамалған яки из дерәксиз йоқалғаниди.

“шинҗаң” гезитиниң хәвәр қилишичә, ма шиңрүй юқириқи сөзләрни шинҗаң иҗтимаий пәнләр академийәси, шинҗаң әдәбият-сәнәтчиләр бирләшмиси, шинҗаң ‍иҗтимаий пән тәтқиқатчилири бирләшмиси қатарлиқ орунларни көздин кәчүргәндә ейтқан. У мундақ дегән: “дәврниң авазини аңлап, дәврниң чақириқиға аваз қошуп, зор вә җиддий мәсилиләрни әстайидил тәтқиқ қилип вә һәл қилип, шинҗаңниң узун муддәтлик әминликигә мунасивәтлик чоңқур қатламлиқ мәсилиләрни чөридигән һалда, диққәтни җуңхуа миллити ортақ еңини шәкилләндүрүш қатарлиқ зор мәсилиләргә мәркәзләштүрүш керәк”.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт