Ma shingruy Uyghur diyarida “Yéshil muhit” yaratmaqchimu?

Muxbirimiz eziz
2022.06.10

Uyghur aptonom rayonluq partkomning sékrétari ma shingruy yéqinda Uyghur diyarida muhit qurulushini yaxshilap “Yéshil muhit” berpa qilish heqqide mexsus söz qilghan. Shundaqla buni “Bash sékrétar shi jinpingning tebrik sözining rohi bilen zich birleshtürgen halda emelge ashurush” ni tekitligen.

Xitay hökümiti bashqurushidiki “Tengritagh tori” ning 10-iyundiki xewiride éytilishiche, aldinqi küni chaqirilghan Uyghur aptonom rayonluq partkomning da'imiy hey'etler yighinida ma shingruy mexsus söz qilghan. U sözide xitay re'isi shi jinpingning 5-iyun küni “Dunya muhit küni” munasiwiti bilen yollighan tebrik télégrammisida otturigha qoyulghan muhitning muhimliqi hemde yéshil muhit berpa qilish toghrisidiki sözlirining rohini, shuningdek “Sung chingling fondi” qurulghanliqining 40 yilliqi munasiwiti bilen yollighan tebrik télégrammisidiki partiye tarixini yaxshi öginish heqqidiki yolyoruqlirini qet'iy izchillashturushni tekitligen. Shuningdek qanunchiliq qurulushini kücheytip “Qanun hemmila jayni qaplighan we hemmila jayda omumlashqan” weziyet yaritish lazimliqini bildürgen.

Ma shingrüy riyasetchilik qilghan bu yighinda “Jungxu'a milliti ortaq gewdisi” éngini kücheytish, islamni xitaychilashturushni emelge ashurush qatarliqlar yene tekitlen'gen.

Ma shingruyning muhit asrash, partiye tarixi we qanunchiliq qurulushidin ibaret bir-birige zadila jipsilashmaydighan üch témini bir qétimliq yighinda barawer otturigha qoyushi buning mahiyette merkiziy hökümetning sho'arini tekrarlashtin bashqa ish emeslikini körsitip béridu, dep qaralmaqtiken. Yene beziler bolsa ma shingruyning bu xil “Ilmiy nezeriye” tüsini alghan sho'arlarni otturigha qoyushi uning yughuri melumatliq siyasiy rehber ikenlikining ipadilinishi, dep qarimaqtiken. Emma xitay hökümitining ötken yérim esirde ghayet zor kölemde yer asti bayliqi qézish jeryanida Uyghur diyarining muhitini mislisiz weyran qilip bolghanliqini, shuningdek milyonlarche Uyghurni lagérlargha qamap dunyadiki eng wehshiyane qanunsizliqning ülgisini “Tiklep bergen” likini eskertken musteqil siyasiy analizchi ilshat hesen “Ma shingruyning doktorluq unwani alghanliqi hergizmu uning jallatliqta chén chu'en'gogha yetmeydighanliqini körsetmeydu. Adolof xitlérning eng küchlük yardemchisi bolghan joséf géblés (Joseph Goebbels) mu edebiyat penlirining dokturluqini alghan jallat idi” deydu.

Derweqe yéqinda pash bolghan “Shinjang saqchi höjjetliri” namidiki arxiplarmu xitay merkiziy hökümiti békitip bergen qirghinchiliq heqqidiki bash nishanning chén chu'en'go yötkep kétilgendin kéyinmu dawamliq halda ijra qilinidighanliqini tekitligenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.