Uyghur aptonom rayonining yéngi partkom sékritari ma shingruy shi jinpingning siyasitini dawamlashturidighanliqini bildürgen

Muxbirimiz erkin
2021-12-27
Share
Uyghur aptonom rayonining yéngi partkom sékritari ma shingruy shi jinpingning siyasitini dawamlashturidighanliqini bildürgen Uyghur rayonluq partkomning sékrétari chén chüen'goning ornigha gu'angdung ölkilik partkomning mu'awin sékrétari we ölke bashliqi bolghan ma shingrüyning yötkep kélin'gen.
Photo: RFA

Xitayning Uyghur aptonom rayonigha yéngi téyinligen partkom sékritari ma shingruy shi jinpingning “Shinjangni idare qilish siyasiti” de dawamliq ching turudighanliqini bildürgen.

“Shinjang géziti” ning xewer qilishiche, ma shingruy 26-dékabir yekshenbe küni rayondiki kadirlargha qilghan sözide shi jinpingning orunlashturushni dawamliq ijra qilip, rayonda ijtima'iy muqimliq we ammiwiy tertipni izchil qoghdaydighanliqini éytqan. Közetküchilerning éytishiche, ma shingruyning bu sözliri bezi gherb döletliri, xelqaraliq musteqil sot mehkimisi we kishilik hoquq teshkilatliri teripidin “Irqiy qirghinchiliq” dep eyiblen'gen xitayning “Shinjang siyasiti” de bundin kéyinmu chong özgirish bolmaydighanliqining bishariti iken.

Xitay kompartiyesi 25-dékabir tuyuqsiz qarar chiqirip, Uyghur aptonom rayonluq partkomning sékritari chén chu'en'goning buningdin kéyin bu wezipini ötimeydighanliqini élan qilghan. Uning ornigha gu'angdong ‍ölkisining bashliqi ma shingruyni yötkep kelgen. Chén chu'en'go milyonlighan Uyghurlarning lagér, we türmilerge qamilishi, mejburiy emgekke sélinishi, Uyghur a'ililirining weyran qilinishi, Uyghur ayallirining tughmas qilinp, Uyghur nupusining “Pilanliq, sistiméliq we meqsetlik” azaytilishida oynighan roli seweblik xelq'arada jawabkarliqqa tartish chuqanliliri künsayin küchiyiwatqan bir waqitta wezipisidin ayrilghan.

“Shinjang géziti” ning éytishiche, ma shingruy 26-dékabir achqan tunji kadirlar yighinida, “Biz shinjang jem'iyitidiki uzun muddetlik muqimliqni qet'iy saqlishimiz kérek. Asan'gha toxtimighan bu muqimliqni arqigha qayturushqa yol qoymasliqimiz lazim” dégen. U sözining mutleq köp qismida shi jinping idiyesini we uning “Shinjangni idare qilish pilani” ni dawamliq ijra qilidighanliqi, “Yuquri süpetlik iqtisadi tereqqi'iyat” ni algha sürüdighanliqini qeyt qilghan. Biraq u konkirét ijra'atlar toghrisida tepsiliy toxtalmighan.

62 Yashliq ma shingruy amérika prézidénti jow baydén ‍uyghur rayonida ishlepchiqirilghan mejburiy emgek mehsulatlirini cheklesh toghrisidiki “Uyghur mejburi emgikining aldini élish qanun layihesi” ge imza qoyup, uni resmiy qanun'gha aylandurughan bir waqitta partkom sékritarliqigha yötkep kélin'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet