Ма шиңруй қәшқәр вә қизилсудики зияритидә муқимлиқ, хитай тили маарипи вә “җуңхуа еңи” ни күчәйтишни тәкитлигән

Мухбиримиз ирадә
2021.12.30
Share on WhatsApp
Share on WhatsApp

Хитайниң уйғур райониға йеңидин тәйинлигән партком секритари ма шиңруй қәшқәр вилайити вә қизилсу областида зиярәттә болған.

Хитайниң “шинҗаң гезити” тарқатқан хәвәргә қариғанда, ма шиңруй 29-декабирдин 30-декабирғичә қәшқәр вилайити вә қизилсу қирғиз аптоном областида тәкшүрүш елип барған. У бу җәрянда хитай дөләт рәиси ши җинпиңниң аталмиш “шинҗаң хизмити” тоғрисидики муһим сөзини изчиллаштуруш вә партийәниң йеңи дәврдики шинҗаңни идарә қилиш истратегийәсини толуқ йолға қоюш, җәмийәтниң муқимлиқи вә узун муддәтлик әминликни омумий нишан сүпитидә чиң тутуш қатарлиқларни тәкитлигән.

Ма шиңруй зиярити давамида санаәт районлири, ширкәтләр, йеза-кәнт мәһәллә комитетлири вә мәктәпләр қатарлиқ охшимиған орунларни зиярәт қилип, “муқимлиққа, җәмийәт аманлиқиға, иқтисадий тәрәққиятқа давамлиқ капаләтлик қилиш” һәққидә бир қатар йолйоруқларни бәргән. Болупму униң қәшқәр унверситети, ақто наһийәлик техника тәрбийәләш мәктипи вә қәшқәр кона шәһәр наһийәсидики тоққузақ базири мәркизи башланғуч мәктипидә қилған “кәспий маарипта ихтисаслиқ хадимларни йетиштүрүш керәк. яшлар, деһқанлар вә чарвичилар кәспий маһарәт тәрбийәсини қобул қилиши керәк. Асасий маарип чоқум ениқ болуши керәк, идийә вә сиясий тәрбийәни күчәйтип, сотсиялистик қиммәт қаришидики маарипни күчәйтишимиз вә җуңхуа миллити еңидики маарипни күчәйтиш керәк,” дегән сөзлири диққәт қозғиған.

Чәт әлләрдики көзәткүчиләр ма шиңруйниң қәшқәр вә қизилсудики зияритидә пәрәз қилинғинидәк “кона муқамни товлап” уйғур елидики юқири бесимлиқ тәқип сиясити, лагер түзүми, ассимлатсийә сииясәтлирини охшаш давам қилидиғанлиқини намайән қилғанлиқини билдүрмәктә.

Уларниң ейтишичә, ма шиңруйниң йеңи вәзипигә олтуруп тунҗи шәһәр атлап қилған зияритини уйғурлар әң зич олтурақлашқан қәшқәр вә қизилсудин башлиши, хитай һөкүмитиниң йоқири бесимлиқ сияситиниң нишанида йәнила җәнубни контрол қилишниң асаслиқ орунни игиләйдиғанлиқини көрситип беридикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.