Ma shingruy bingtüenning nopus kötürüsh sighimchanliqini kücheytishni telep qilghan

Washin'gtondin muxbirimiz erkin teyyarlidi
2023.09.20

Uyghur aptonom rayonluq partkomning sékrétari ma shingruy 18-séntebir “Shinjang ishlepchiqirish qurulush bingtüeni” ning ghuljada turushluq 4-diwiziyesining kökdala shehirini közdin kechürgende, bingtüenning nopus kötürüsh sighimchanliqini kücheytip, bingtüen bilen yerlikning yughurulushini tézlitishni telep qilghan. Bu ma shingruyning xitay rehbiri shi jinping ötken ayning axirliri jenubiy afriqadin qaytish sepiride tuyuqsiz ürümchide toxtap, Uyghurlargha qaritilghan qattiq qol siyasitini téximu kücheytishni, “Teste qolgha kelgen ijtima'iy muqimliqni saqlash yenila eng muhim wezipe bolushi” ni, muqimliqni “Tereqqiyatqa kapaletlik qilish” üchün ishlitishni, rayonda “Islamni xitaychilashturush” ni dawamliq algha sürüshni telep qilishidin béri, tunji qétim ghuljada tekshürüshte bolushidur.

“Tengritagh tori”, “Shinjang géziti” qatarliq hökümet taratqulirining xewer qilishiche, ma shingruy qazaqistan bilen bolghan qorghas chégrasidiki kökdala shehiride tekshürüshte bolghanda, yerlik emeldarlargha yolyoruq bérip, bingtüen bilen yerlikning yughurulushini tézlitish, xitayning rayondiki yérim qoralliq yérim ishlepchiqirish gewdisi bolghan bingtüenning nopus kötürüsh sighimchanliqini ashurushni tekitligen. Ma shingruy mundaq dégen: “Bbingtüenning tereqqiyat iqtidarini ashurushqa ehmiyet bérip, bingtüen bilen yerlikning her jehettiki bayliq teqsimatini maslashturup we elalashturup, bingtüen'ge qarashliq diwiziye, sheher, polk we meydanlarning igilik we nopus kötürüsh sighimchanliqini yuqiri kötürüshni tézlitishimiz kérek.”

Ma shingruy, bingtüenning “Yétekchi igilikini kücheytishke ehmiyet bérip, iqtisadiy kölimini üzlüksiz kéngeytishni, yuqiri ölchemlik we yuqiri süpetlik sheher-bazar pilanlash qurulushini algha sürüp, sana'et bilen sheherlerni, sheher bilen yézilarni bir gewdileshtürüshni chongqurlashturushi, uning radiyatsiye küchi, heriketlendürgüchi küchi we jelp qilish küchini üzlüksiz yuqiri kötürüsh” ni telep qilghan.

Xitay hökümiti 2017-yili bashlap Uyghurlarni keng kölemlik tutqun qilishtin burunla bingtüenning siyasiy, iqtisadiy tesiri, atalmish “Muqimliq” ni saqlashtiki rolini kücheytip, uning nopusi we kölimini téz sür'ette kéngeytishke kirishken. Xitayning rayondiki mezkur yérim qoralliq yérim ishlepchiqirish gewdisi bolghan bingtüen ilgiri kanada, amérika, yawropa ittipaqi, en'gliye qatarliq döletler teripidin Uyghurlarni basturushta oynighan aktip roli seweblik jazalan'ghan.

“Shinjang géziti” ning éytishiche, ma shingruy bingtüen da'irilirige yene “Partiyening yéngi dewrdiki shinjangni bashqurush istratégiyesini toluq, toghra we etrapliq emeliyleshtürüp, yuqiri süpetlik tereqqiyatni nuqtiliq ching tutush” ni tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.