Közetküchiler, ma shingrüyning “Jungxu'a milletliri ortaq éngini mustehkemlesh—tarixiy muqerrerlik” dégen sepsetesi qattiq eyiblidi

Xitayche “Tengritagh tori” 25-dékabir élan qilghan bir xewerge qarighanda, Uyghur aptonom rayonluq partkomning sékritari ma shingrüy “Birinchi qol bashliq hemmige mes'ul bolush” rolini ishqa sélip, aptonom rayonluq siyasiy kéngeshning “Jungxu'a milletliri ortaq éngini dawamliq mustehkemlesh” teklip layihesining ijra qilinish ehwalidin bérilgen doklatni anglighan.

 Yighinda ma shingrüy söz qilip, “Shinjang köp milletlik chégra rayon, shunga jungxu'a milletliri ortaq éngini mustehkemlesh jem'iyetning muqimliqi we uzaq muddetlik eminlikini saqlashta intayin muhim ehmiyetke ige” dégen hemde barliq milletning “Jungxu'a éngi” ni mustehkemleshning “Tarixiy muqerrerlik, pewqul'adde muhim wezipe” ikenlikini tekitligen.

2024-Yilning béshida, Uyghur aptonom rayonluq siyasiy kéngesh ezaliri sun'ghan “Jungxu'a milletliri ortaq éngini dawamliq mustehkemlesh” teklip layiheside, Uyghur élidiki her millet ammisini medeniyet, iqtisad, jem'iyet, hetta pisxologiye jehettin bir gewdileshtürüsh, yeni “Jungxu'a éngi” gha mujessem qilish, buning üchün “Jungxu'a milletliri ortaq éngini mustehkemlesh” ni ma'arip terbiyesige kirgüzüsh, “Milletler bir a'ile” pa'aliyetlirini qanat yaydurush, her millet yashlirini öz'ara pikir almashturushqa yéteklesh qatarliq teklipler bérilgen.

Xitay weziyitini közetküchiler “Xitayning milliy assimilyatsiye siyasiti” dep qarawatqan “Jungxu'a milletliri ortaq éngini mustehkemlesh” siyasiti, mezkur xewerde “Partiyening yéngi dewr milletler siyasiti, shundaqla milletler xizmitining tüp liniyesi” déyilgen. Uyghur aptonom rayonluq partkomning 10-nöwetlik qurultiyidin kéyin qurulghan “Jungxu'a milletliri ortaq éngini mustehkemlesh xizmiti partkom rehberlik guruppisi”, partkom birliksep bölümi qatarliq 20 nechche idare-organni yétekleydiken. Bu organlar xitay da'irilirining “Jungxu'a éngini mustehkemlesh” namidiki milliy assimilyatsiye siyasiti üchün birlikte pilan tüzüp, birlikte xizmet orunlashturup, birlikte heriket qilip, 14 oblast, wilayet, sheherde “Milletler bir a'ile” pa'aliyiti qanat yayduridiken.

Amérikadiki siyasiy obzorchi xu pingning radiyomizgha bildürüshiche, “Jungxu'a milletliri ortaq gewdisi éngini mustehkemlesh” siyasiti, xitay tili we xitay bayramlirini Uyghur qatarliq milletlerge téngish yoli bilen ijra qilinmaqta iken. Buningdiki meqset bashqa milletlerni xitaydin perqsiz haletke élip kélish bolup, mahiyette bu ularning milliy mewjutluqini chetke qéqish we axirida ularni éritip yoqitish siyasitining del özi iken.