Ma shingruyning turpanda “Yuqiri süpetlik tereqqiyat” heqqide qilghan sözliri diqqet qozghimaqta

Uyghur aptonom rayonluq partkomning sékrétari ma shingruy yéqinda turpan wilayitide “Xizmetlerni közdin kechürüsh” jeryanida “Bash sékrétar shi jinpingning yéqinda aptonom rayonluq hökümet we bingtüenning xizmet xulasisini anglighanda qilghan sözlirining rohini chongqur özleshtürüsh, partiyening yéngi dewrdiki shinjangni idare qilish siyasitini toluq ijra qilish” heqqide wez éytqan.

Xitay bashqurushidiki “Tengritagh” torining 12-séntebirdiki xewiride éytilishiche, ma shingruy turpan muzéyi, idiqut üzümchilik bazisi qatarliq jaylargha bérip “Yuqiri süpetlik tereqqiyat” ni yéngi pellige élip chiqish heqqide yolyoruq bergen. Shuning bilen birge xitay hökümitining “Shinjangni medeniyet arqiliq sughirish” , “Jungxu'a milliti ortaq kimliki chüshenchisini chongqurlashturush” xizmitini ikkinchi türkümdiki asasiy ma'arip endizisi qilishni tekitligen. Emma Uyghurlarning eng qedimiy makanliridin bolghan turpandiki yerlik xelqning turmushini yaxshilash heqqide bir éghizmu söz bolmighan.

Xitay hökümiti ötken yillardin bashlap izchil türde Uyghur diyarini özlirining eng chong ishlepchiqirish bazilirining birige aylanduruwatqan bolup, buningdiki “Sekkiz chong kesip topi” eng nuqtiliq türlerdin bolup qalghan. Bu ehwal bolsa izchil xitay axbaratlirida “Yuqiri süpetlik tereqqiyat” dep teriplinip kéliwatqanliqi melum. Ma shingruy bu qétimqi “Közdin kechürüsh” jeryanida shi jinpingning ürümchide sözligen sözlirini öginishning bir türlük jiddiy siyasiy wezipe ikenlikini, buning uzun mezgillik eminlik we muqimliq berpa qilish, “Beshni étirap qilish” ni omumlashturushtiki tüp we uzun mezgillik achquch ikenlikini eskertish arqiliq nöwette ijra qiliniwatqan siyasiy tedbirlerning uzun muddet dawam qilidighanliqini ishare qilghan.