Ma shingrüyning chaghanliq hal sorash ziyariti xitay éngini teshwiq qilish pa'aliyiti bolghan

Washin'gtondin muxbirimiz uyghar teyyarlidi
2024.02.14

“Shinjang géziti” ning 14-féwral künidiki xewirige qarighanda, Uyghur aptonom rayonluq partkomning sékrétari ma shingrüy Uyghur élining jenubidiki xoten, qeshqer we aqsu qatarliq besh wilayitide élip barghan chaghanliq hal sorash ziyaritide, xitay medeniyiti we xitay éngini kücheytishni tekitligen.

Ma shingrüy bu qétimliq ziyaritide jenubtiki wilayetlerde xizmetlerni yaxshi ishlesh heqqide yolyoruq bergende:

 “Jungxu'a milliti kimlikni kücheytip, kishilerning qelbini mujessemlep, medeniyet bilen ozuqlandurushni chongqurlashturup, jungxu'a milliti éngi tuyghusini kücheytish kérek. Bu, shinjangni tereqqiyat qildurush we uzun muddetlik eminlikke ige qilishning asasi” dégen.

Yillardin buyan, xitay hökümitining “Jungxu'a milliti ortaq gewdisi éngini mustehkemlesh” we “Shinjangni medeniyet arqiliq ozuqlandurush” dégendek namlar astida mustemlike we assimilyatsiye siyasitini ijra qilip kelgenliki we bu arqiliq Uyghur élini mutleq xitayning makani qilmaqchi bolghanliqi melum.

 Kishilik hoquqni közitish teshkilatining tetqiqatchisi maya wang “Shinjangni medeniyet arqiliq ozuqlandurush qurulushi” toghruluq qilghan sözide, “Xitay hökümitining atalmish ‛medeniyet qurulushi‚ Uyghurlarni xitaylashturush, bu emeliyette insaniyetke qarshi jinayet tüsini alghan” dep körsetken.

Xitay kompartiyesining bash sékrétari shi jinpingmu yéqinda béyjingda chiqidighan xitay kompartiyesining organ zhurnili “Izdinish” ta mexsus maqale élan qilip, “Jungxu'a millitining ulugh güllinishining muqerrer halda herqaysi milletlerning yughurulushi dawamida ishqa ashidighanliqi” ni ilgiri sürgen idi.

Doktor hénri shajéskige oxshash mutexessislerning bildürüshiche, nöwette xitay hökümitining Uyghur élining chet rayonlardiki yéza-qishlaqlirighiche Uyghurlarni mejburiy assimilyatsiye qilish, mejburiy xitaylashturush herikiti téxi xitay hökümitining kütkinidek netije bermigen, shu sewebtin xitay hökümitining bu heriketni téximu kücheytish éhtimali bar iken.  

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.