Адәм шеф: «трамп һөкүмити уйғур мәсилисидә магнитиский қанунини ишқа селишни ойлишиши керәк»

Мухбиримиз әркин
2019-05-24
Елхәт
Пикир
Share
Принт

Америка авам палата әзаси, авам палата истихбарат комитетиниң рәиси адам шеф «сан-франсиско һадисилири гезити» дә мақалә елан қилип, трамп һөкүмитиниң магнитиский қанунини ишқа селип уйғурларниң кишилик һоқуқини дәпсәндә қилишта җавабкарлиқи бар хитай әмәлдарлириға җаза тәдбирлирини йүргүзүши керәкликини билдүргән.

Мақалидә, хитай назарәт системисиниң һечқандақ бир йәрдә шинҗаңдикидәк көрүнәрлик әмәслики әскәртилип, «хитай һөкүмити шинҗаңда кәң көләмлик лагерлар тори қуруп, бир милйондин артуқ уйғур вә башқа мусулман аз санлиқларни қануни рәсмийәтсиз яки гуман билән тутуп турмақта. Даириләр бу лагерларниң мәқсити ‹террорлуққа тақабил туруш' десиму, лекин әмәлийәттә тутқун дин вә етник тәвәликни асасида елип берилмақта» дейилгән.

Адәм шефниң мақалиси 23‏-май күни америка кеңәш палатаси ташқи ишлар комитети бирдәк «уйғур кишилик һоқуқ қанун лайиһәси» ни мақуллиған күни елан қилинған. Адәм шеф «америка чоқум назарәт технологийәсиниң йейилиш тәһдитигә тақабил туруши керәк» сәрләвһилик мақалисидә мундақ дегән: «16‏-май күни авам палата истихбарат комитети дигитал истибдатлиқ вә әркин дуня рәһбәрлири һәм американиң шинҗаң вә йәр шари миясидики бу хирисқа қандақ тақабил туруши һәққидә гуваһлиқ йиғини өткүзди. Трамп һөкүмити йәр шари магнитиский қанунини ишқа селип, бастуруш сияситидә җавабкарлиқи бар хитай әмәлдарлириниң саяһәт қилишини чәклиши вә мал мүлкини тоңлитиши керәк. Америка дигитал истибдатлиққа қарши өзиниң рәһбәрлик ролини җари қилдуруп, буниң авам хәлқиниң күндилик һаятиға сиңип кириши керәк. Буниң әң яхши башлиниш нуқтиси шинҗаң болуп, америка демократик дөләтләр билән һәмкарлишип, бу кишилик һоқуқ дәпсәндичиликигә риқабәт елан қилиши керәк».

Адам шеф «уйғур кишилик һоқуқ қанун лайиһәси» ниң америка дөләт мәҗлиси авам палатасида оттуриға қоюлған нусхисиға капаләтлик бәргән демократик авам палата әзалириниң бири. Қанун лайиһәсиниң авам палатасидики нусхисини авам палата әзаси кристофир симис билән там созе оттуриға қойғаниди.

Пикирләр (0)
Share
Толуқ бәт