Xitay da'iriliri Uyghur rayonida malariya (bezgek) késilining pütünley tügigenlikini élan qildi

Muxbirimiz erkin
2019-12-23
Élxet
Pikir
Share
Print

Xitay da'iriliri Uyghur aptonom rayonida malariya késelliki yaki Uyghur tébabitidiki bezgek késilining pütünley tügitilgenliki, yéqinqi 19 yil mabeynide héchqandaq késellik alamiti bayqalmighanliqini élan qildi.

Shinxu'a agéntliqining 21‏-dékabir xewer qilishiche, yéqinda xitay döletlik sehiye-salametlik komitéti xitay döletlik köchmenler idarisi, xitay döletlik tamozhna idarisi qatarliq organlarning mutexessis we wekilliridin teshkil tapqan bir bahalash ömiki Uyghur rayonida tekshürüsh élip bérip, rayonda malariya yaki bezgek késilining pütünley tügigenliki, mezkur rayonning dölet békitken tébbiy jehettiki bahalash ölchemliridin ötkenlikini jakarlighan.

‏Bahalash ömiki 16‏-dékabirdin 19-dékabirghiche rayonda tekshürüsh élip bérip, yuqiriqi xulasini chiqarghan. Nöwette Uyghur aptonom rayonluq da'iriler yéqinqi 19 yildin béri rayonda héchqandaq malariya yaki bezgek késelliki alamitining bayqilip baqmighanliqini ilgiri sürmekte.

Ularning xitay taratqulirida qeyt qilishiche, Uyghur rayonida2011-we 2019‏-yili bayqalghan 48 késellik alamiti chet'elge baghlinishliq iken. Lékin közetküchiler, Uyghur aptonom rayonluq da'irilerning rayonda yüz bergen yuqumluq késelliklirini izchil mexpiy tutup kéliwatqanliqi, shunga xitayning bu jehettiki sanliq melumatlirining ishenchilikliki gumanliq ikenlikini bildürmekte.

Ularning qarishiche, bolupmu rayonda Uyghur, qazaq we bashqa musulmanlar ning DNA ambiri qurulup, 3 milyondek musulman lagérlargha qamalghan, shundaqla rayonda uchur qattiq kontrol qiliniwatqan hazirqidek ehwalda xitayning sanliq melumatlirigha guman bilen qarimasliq téximu müshkül iken. Xitay hökümiti ilgiri omumi xelq salametlik tekshürüshi namida rayondiki yerlik xelqlerning qan ewrishkisini yighip, DNA uchur ambiri qurghan, emma bu ishlarni ularning xewirisiz élip barghan idi. Xitay tartqulirining ilgiri sürüshiche, Uyghur rayonida eng axirqi qétimliq malariya bilen yuqumlinish weqesi 2000‏-yili toxsu nahiyeside bayqalghan iken.

Toluq bet