Хитай баянатчиси хуң лей малайшияда қолға чүшкән уйғурлар үстидә тәкшүрүш елип бериватқанлиқини ейтқан

Мухбиримиз ирадә
2014-10-09
Share

Хитай ташқи ишлар министирлиқиниң мухбирларни күтүвелиш йиғинида бир мухбир баянатчиси хуң лейдин малайшияда қолға чүшкән 155 уйғурни хитай һөкүмитиниң қайтуруп әкетидиған яки әкәтмәйдиғанлиқини сориғинида, хоң лей буниңға җаваб берип "биз әһвалдин хәвәр таптуқ, вәқә үстидә техи тәкшүрүш елип бериватимиз" дегән.

Малайшия көчмәнләр даирилири өткән йәкшәнбә күни куала лумпурдики бир бинадики икки еғизлиқ өйдә җәмий 155 нәпәр уйғур мусапирни қолға чүшүргәнликини елан қилған. Уларниң 76 нәпири кичик бала иди.

Нөвәттә бу уйғурларниң тәқдири, чәтәлләрдики уйғур паалийәтчиләрни әндишигә салмақта. Улар малай һөкүмитини мусапирларни қоғдап, уларни б д т ниң мусапирлар қануни бойичә бир тәрәп қилишқа чақирмақта. Түнүгүн малайшиядики бир қисим кишилик һоқуқ органлириму малай һөкүмитини бу уйғурларни хитайға қайтурмаслиққа чақирған. Б д т ниң малайшиядики мусапирлар ишханиси башлиқи чаршәнбә күнидики сөзидә, өзлириниң бу кишиләрниң әһвалини айдиңлаштуруш үчүн алақидар орунлар билән алақилишиватқанлиқини ейтқан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт