Malayshiya dölet mudapi'e ministiri: "Uyghur musulmanliri uchrawatqan mu'amilige süküt qilmiduq"

Muxbirimiz erkin
2019-04-22
Élxet
Pikir
Share
Print

Malayshiya dölet mudapi'e ministiri muhemmed sabu, malayshiyaning xitayning Uyghur musulmanlirigha tutqan mu'amilisige süküt qiliwatqanliqi heqqidiki pikirni ret qilip, malayshiyaning diplomatik qanallar arqiliq mezkur mesilige bolghan naraziliqini ipadilep kéliwatqanliqini bildürgen. "Malay pochtisi géziti" ning 21‏-aprél xewer qilishiche, muhemmed sabu bu sözlerni yéqinda "Malay pochtisi géziti" ning ziyaritini qobul qilghanda ashkarilighan.

U, "Biz tashqi ishlar ministirliqining bashchiliqida dawamliq diplomatik qanallarni ishlitimiz. Tashqi ishlar ministiri xitayda yüz bériwatqan bu hadisini öz'ara söhbetliride izchil otturigha qoyup kelmekte" dégen. 

Malayshiya xitayning Uyghurlarni keng kölemlik teqiblep, 2 milyondek Uyghur we bashqa musulmanlarni yighiwélish lagérlirigha qamishigha naraziliq bildürgen tunji musulman döliti. U, 2017‏-yili tayland türmisidin qéchip ötken 11 neper Uyghurni xitaygha qayturup bérishni ret qilip, ötken yili 10‏-ayda ularni türkiyege yolgha sélip qoyghan idi. 

Muhemmed sabu yene, belkim bu ishlarning ashkara élan qilinmasliqi mumkinliki, lékin uning diplomatik yollar bilen ikki dölet otturisida dawamliq muzakire qilinidighanliqini bildürgen. Xewerde qeyt qilinishiche, "Malay pochtisi géziti" ning muxbiri malayshiya hökümitining isra'iliyeni tenqid qilishta aktip bolsimu, lékin néme üchün xitayning Uyghur musulmanlirigha tutqan mu'amilisige süküt qilidighanliqini sorighan. Muhemmed sabu yéqinqi ikki hepte ichide Uyghur mesilisige inkas bildürgen chet'elning 2‏-dölet mudapi'e emeldari. Aldinqi hepte amérika dölet mudapi'e ministirliqining yardemchi ministiri rendi shraywér amérikadiki xadson institutida ötküzülgen bir yighinda Uyghur mesilisini tilgha alghan. U amérikaning xitay we yawropa ittipaqi bilen bolghan munasiwiti heqqide toxtilip, "Shinjangdiki insaniyet tragédiyesi tashqi dunyagha namelum halette turmaqta" dégen idi.

Toluq bet