Малайсия һөкүмити бир университетни уйғурлар дияридики зулумни тәкшүрүшкә мәсул қилди

Мухбиримиз әзиз
2019.12.31

 

Хитай һөкүмитиниң уйғурлар дияридики зулум вә бастурушлириға қарита малайсия мусулманлири арисида қаттиқ наразилиқ пәйда болғандин кейин малайсия һөкүмити бу мәсилини хитай тәрәпниң диққитигә сунған иди. Хитай һөкүмити дәрһалла “чәтәлләрдики дүшмән күчләрниң қарап чаплаш сүйиқәсти” һәққидики бир қатар материялни тәйярлап, малайсия һөкүмитини алдинип қалмаслиққа үндигән. Малайсия ташқи ишлар министири сәйфидин абдулла бу һәқтә сөз қилип “малайсия бу мәсилидә хитай һөкүмитиниң доклатлириға қара қоюқ ишәнмәйду, шундақла уни очуқ ашкариму тәнқид қилмайду” дегән иди.


30-Декабир күни малайсия һөкүмити пайтәхт куала лумпурдики “исламий тәпәккүр вә мәдәнийәт хәлқара иниститути” ни уйғурлар дияридики зулумға даир мәсилиләр һәққидә оттуриға чиққан мәлуматларни дәлилләшкә мәсул қилип бекитти. Малайсиядики “боғуз вақти” гезитиниң бу һәқтә берилгән хәвиридә ейтилишичә, малайсия һөкүмити мушу арқилиқ “шинҗаңда уйғурларниң терорлуқ һәркити бар яки йоқлуқини, бу җайда терорлуқниң зади қайси дәриҗидә икәнликини тәкшүрүш” ни үмид қилмақтикән. 

Куала лумпурдики уйғурларни қоллиғучи мусулманлар өткән һәптә хитай әлчиханиси алдиға топлинип: “уйғурларға қаритилған қирғинчилиқни тохтисун!” дәп шоар товлиған иди. Хитайниң малайсиядики баш әлчиси бәй тйән болса бу һәқтә чүшәнчә берип: “биз бу хилдики асассиз төһмәтни қобул қилалмаймиз” дегән. Униң бу сөзи малайсия баш министири муһәммәд махатир: “биз малайсияға қечип кәлгән һәрқандақ уйғурни хитайға қайтуруп бәрмәймиз. Хитай һөкүмити тәләп қилсиму өткүзүп бәрмәймиз” дәп баянат елан қилғанниң әтисигә тоғра кәлгән.

 

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.