Malaysiya hökümiti bir uniwérsitétni Uyghurlar diyaridiki zulumni tekshürüshke mes'ul qildi

Muxbirimiz eziz
2019-12-31
Share

 

Xitay hökümitining Uyghurlar diyaridiki zulum we basturushlirigha qarita malaysiya musulmanliri arisida qattiq naraziliq peyda bolghandin kéyin malaysiya hökümiti bu mesilini xitay terepning diqqitige sun'ghan idi. Xitay hökümiti derhalla "Chet'ellerdiki düshmen küchlerning qarap chaplash süyiqesti" heqqidiki bir qatar matériyalni teyyarlap, malaysiya hökümitini aldinip qalmasliqqa ündigen. Malaysiya tashqi ishlar ministiri seyfidin abdulla bu heqte söz qilip "Malaysiya bu mesilide xitay hökümitining doklatlirigha qara qoyuq ishenmeydu, shundaqla uni ochuq ashkarimu tenqid qilmaydu" dégen idi.


30-Dékabir küni malaysiya hökümiti paytext ku'ala lumpurdiki "Islamiy tepekkür we medeniyet xelq'ara inistituti" ni Uyghurlar diyaridiki zulumgha da'ir mesililer heqqide otturigha chiqqan melumatlarni delilleshke mes'ul qilip békitti. Malaysiyadiki "Boghuz waqti" gézitining bu heqte bérilgen xewiride éytilishiche, malaysiya hökümiti mushu arqiliq "Shinjangda Uyghurlarning térorluq herkiti bar yaki yoqluqini, bu jayda térorluqning zadi qaysi derijide ikenlikini tekshürüsh" ni ümid qilmaqtiken. 

Ku'ala lumpurdiki Uyghurlarni qollighuchi musulmanlar ötken hepte xitay elchixanisi aldigha toplinip: "Uyghurlargha qaritilghan qirghinchiliqni toxtisun!" dep sho'ar towlighan idi. Xitayning malaysiyadiki bash elchisi bey tyen bolsa bu heqte chüshenche bérip: "Biz bu xildiki asassiz töhmetni qobul qilalmaymiz" dégen. Uning bu sözi malaysiya bash ministiri muhemmed maxatir: "Biz malaysiyagha qéchip kelgen herqandaq Uyghurni xitaygha qayturup bermeymiz. Xitay hökümiti telep qilsimu ötküzüp bermeymiz" dep bayanat élan qilghanning etisige toghra kelgen.

 

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet