Кеңәш палата әзаси рубио ақсарай дөләт хәвпсизлик комитетида диний әркинлик алаһидә мәслиһәтчиси тәйинләшни тәләп қилған

Америка кеңәш палата әзаси марко рубио(Marco Rubio) йеқинда америка президенти җов байденға мәктуп йезип, униңдин ақсарайниң дөләт хәвпсизлик комитетида хәлқара диний әркинлик алаһидә мәслиһәтчиси тәйинләшни тәләп қилған.

Марко рубиониң тәкитлишичә, коммунист хитайниң тибәтләр, фалунгоңчилар вә уйғурларға қаритилған диний бастурушидин тартип, никарагуа, куба, шималий корейәдә хиристиянларниң, иранда баһайиларниң җазалинишиғичә болған ишларда, америка ‍өзиниң дунядики диний әркинликни қоғдаш вәдисидә давамлиқ чиң туридиғанлиқини қайта қәйт қилиши керәк икән. Марко рубиониң ишханиси 7-май күни елан қилған баянатта, марко рубиониң пирезидент байденға американиң вәдисини қайта тәкитләп, уни бош қалған бу орунни дәрһал толуқлашқа чақирғанлиқи қәйт қилинмақта.

Баянатта мундақ дейилгән: “лаяқәтлик һәм тәҗрибилик бирсини дөләт хәвпсизлик комитетида хәлқара диний әркинлик ишлири бойичә алаһидә мәслиһәтчи тәйинләш дөлитимизниң бу негизлик кишилик һоқуққа болған беғини гәвдиләндүрүпла қалмай, тоқунуш вә муқимсизлиқниң асаслиқ сәвәблиридин бирини һәл қилишқа ярдәм бериш арқилиқ дөләт бихәтәрликимизни күчәйтиду.”

Рубиониң пирезидент байденға язған мәктупи, америка хәлқара диний әркинлик комитетиниң йеқинда йиллиқ доклат елан қилип, америка һөкүмитидин американиң “уйғур кишилик һоқуқ сиясити қануни”, “уйғур мәҗбурий әмгикиниң алдини елиш қанун” лирини толуқ иҗра қилишни, уйғур ирқий қирғинчилиқида җавабкарлиқи бар болған техиму көп хитай әмәлдарлириға җаза йүргүзүшни тәләп қилишиниң арқисидинла йолланған.

Доклатта, хитайниң тибәт вә уйғур дияридики “динни хитайчилаштуруш” сияситиниң мәҗбурий ассимилятсийәгә йол ечип, тибәт вә уйғурларниң диний һәм мәдәнийәт кимликигә җиддий тәһдит пәйда қилғанлиқи агаһландурулған. Диний әркинликкә хилаплиқ қиливатқан хитай әмәлдарлириға вә һөкүмәт аппаратлириға, болупму хитай компартийәси бирликсәп бөлүми, хитайниң җамаәт хәвпсизлик вә дөләт хәвпсизлик тармақлириға нишанлиқ җаза йүргүзүшни тәвсийә қилған иди.