Марко рубийо: "сүкүт қилиш һәргизму таллаш әмәс"

Мухбиримиз нуриман
2021-11-11
Share

9-Ноябир күни америкадики "йәһудий қирғинчилиқи хатирә музейи" симон-скҗод ирқий қирғинчилиқниң алдини елиш тәтқиқат мәркизи "бизни аста-аста йоқатмақчи: хитай һөкүмитиниң уйғурларға қаратқан һуҗуми" сәрләвһлик бир доклат илан қилди. Мәзкур доклатта хитай һөкүмитиниң уйғурларға қаритиватқан "инсанийәткә қарши җинайәт" лирини йәниму күчәйткәнликигә даир ишәнчлик пакитлар көрситип өтүлди.

Доклат елан қилнғандин кейин, хәлқара җамаәтниң диққити қайтидин хитай һакимийитиниң уйғурларға йүргүзүватқан бастурушлириға йөткәлди. Америка башчилиқидики демократик дөләтләрниң хитайниң уйғурларға қаратқан зулумлирини "ирқий қирғинчилиқ" дәп тонуғанлиқидәк бу муһим қарар йәнә бир қетим хәлқара таратқуларниң диққәт мәркизигә кәлди.

Америка ташқий ишлар министирлиқи қаримиқидики "пуқралар бихәтәрлики, демократийә вә кишилик һоқуқ" комитетиниң мудири узра зәя ханим өзиниң иҗтимаий таратқу һисабида америка һөкүмитинң мәзкур доклатқа диққәт қиливатқанлиқини билдүргән. У мундақ дәп язған: "америка һөкүмити ‹йәһудий қирғинчилиқи музейи' тәйярлиған хитай хәлқ җумһурийитиниң шинҗаңдики уйғурларға қаратмилиқ елип бериватқан җинайәтлири тоғрисидики йеңи доклатини қарши алиду. Биз хитай һөкүмитиниң бу бастурушларни дәрһал тохтитип, наһәқ қолға елинғанларни дәрһал қоюп беришни тәләп қилимиз."

Мәзкур доклат елан қилинған күни ирқий қирғинчилиқниң алдини елиш тәтқиқат мәркизиниң иҗтимаий таратқу суписида америка киңиш палата әзаси марко рубийо сөз қилған бир син көрүнүши тарқатқан. Марко рубийо мәзкур син көрүнүшидә мундақ дегән: "дәл мушу вақитниң өзидә хитай компартийәси шинҗаңдики уйғур вә башқа йәрлик милләтләрни йоқитиш үчүн системилиқ һәрикәт елип бармақта. Мәҗбурий туғмас қилиш, җаза лагерлири, мәҗбурий әмгәк вә башқа вәһшийликләр шуниң җүмлисидиндур. Сүкүт қилиш һәргизму таллаш әмәс."

Йәһудий қирғинчилиқи музейиниң симон-скҗод мәркизи чәт әлләрдики уйғур гуваһчилар, тәтқиқатчилар, кишилик һоқуқ адвокатлири вә хәлқара җинайи ишлар қануни мутәхәссислирини зиярәт қилиш арқилиқ бу 59 бәтлик доклатни тәйярлап чиққан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт