Сенатор марко рубийо "уйғур мәҗбурий әмгикиниң алдини елиш қанун лайиһәси" ниң авазға қоюлмайватқанлиқини тәнқидлиди

Мухбиримиз ирадә
2021-12-02
Share

Америка кеңәш палата әзаси марко рубийо "уйғур мәҗбурий әмгикиниң алдини елиш қанун лайиһәси" ниң авазға қоюлмайватқанлиқини йәнә тәнқидлигән.

Сенатор марко рубийониң тивиттердики рәсмий һесабидин тарқитилған синға қариғанда, у 1-декабир күни америка дөләт мәҗлисидә қилған сөзидә өзи баш болуп тонуштурған вә әйни чағда мәйли демократлар болсун яки җумһурийәтчиләр болсун һәр икки партийә әзалириниң толуқ қоллишиға еришкән бу қанун лайиһәсиниң һазирғичә авам палатада авазға қоюлмаслиқиниң өзини һәйран қалдуруватқанлиқини ейтқан.

У мундақ дегән: "уйғур мусулманлири аилилиридин җуда қилинип қуллардәк мәҗбурий әмгәккә селиниватиду. Улар диний-етиқадидин ваз кечишкә, исмини өзгәртишкә мәҗбурлиниватиду, шундақла мәҗбурий туғмас қилиниватиду. Бу қилмишлар ақиланә һалда ‹ирқий қирғинчилиқ' дәп аталди. Буниң билән мән ‹уйғур мәҗбурий әмгикигә қарши туруш қанун лайиһәси' ни тонуштуруп, уйғурларниң мәҗбурий әмгикигә четишлиқ һәрқандақ мәһсулатниң америкаға киришини чәкләшни тәләп қилдим. Бу лайиһә толуқ аваз билән кеңәш палатасидин өтти, әмма авам палатада авазға қоюлушни күтүп ятиду."

У бу лайиһә хәлқаралиқ чоң ширкәтләрниң мәнпәәтигә тақашқанлиқтин, уларниң буниңға қарши һәрикәт қиливатқанлиқи ениқ болсиму, әмма авам палатасиниң һазирғичә буни авазға қоймаслиқини "чүшиниш қийин" дәп тәкитлигән.

Марко рубийо бу йил 18-январда қилған сөзидиму өзиниң байдин һөкүмити сунған "мудапийә хамчот қануни" ни рәт қилидиғанлиқи, униң 4330-номурлуқ "уйғур мәҗбурий әмгикиниң алдини елиш қанун лайиһәси" ни өз ичигә елишини тәләп қилидиғанлиқини билдүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт