Ma shingruy qeshqerde yighin échip térrorluqqa qarshi turushni qet'iy boshashturmasliqni tekitlidi

Xitay kompartiyesi yéqinda qeshqerde “Kompartiye 20 nöwetlik qurultiyi 3 omumiy yighinining rohini chongqur öginish, izchillashturush we jenubiy shinjangning yuqiri süpetlik tereqqiyatigha türtke bolush” namida bir yighin chaqirghan. Biraq, tereqqiyatni ilgiri sürüsh namida échilghan bu yighinda “Asasiy qatlamda térrorluqqa qarshi turushni, muqimliqni qoghdashni chongqur algha siljitish” tekitlen'gen.

Tengritagh torining bu heqtiki xewiride déyilishiche, 28-iyul küni qeshqerde chaqirilghan bu yighinda partkom sékrétari ma shingruy mexsus söz qilghan. U mundaq dégen:

 “…Jenubiy shinjangda tereqqiyat bilen xewpsizlik, échiwétish bilen muqimliqni birtutash pilanlash kérek. Éhtiyatchanliq we sezgürlükni saqlap, jenubiy shinjangning jem'iyet muqimliqini qet'iy qoghdash kérek. Térrorluqqa qarshi turush, muqimliqni qoghdashni chongqur algha siljitip, ‛üch xil küchler‚ ge qattiq zerbe bérishtek yuqiri bésim halitini qet'iy tewrenmey saqlash kérek. ”

Mashingruy yene, chet ellerdiki közetküchiler teripidin assimilyatsiye siyasiti dep atiliwatqan “Jungxu'a milliti ortaq gewdisi éngi” ni kücheytish, milletlerni yughuruwétish heqqidimu nuqtiliq toxtalghan. U sözide: “Din ishlirini idare qilishtiki qanunchiliqini algha siljitish kérek؛ …her millet ammisining arilishishi, almashturushi, yughurulushini ilgiri sürüshni nishan qilish kérek” , “Ariliship olturaqlishidighan jem'iyet qurulmisi we mehelle muhitini téz berpa qilip, herqaysi milletlerning her tereplime girelishishini ilgiri sürüsh kérek؛ ” dégenlerni tekitligen.

Xitay hökümiti yéqindin buyan amérika qatarliq démokratik döletler hökümetliri we parlaméntliri teripidin “Irqiy qirghinchiliq we insaniyetke qarshi jinayet” dep békitilgen siyasetlirini inkar qilish teshwiqatlirini qattiq kücheytip, rayon weziyitining intayin normalliqini, Uyghurlarning xushal-xuram yashawatqanliqini” ilgiri sürüwatqan idi.

Halbuki, dunya Uyghur qurultiyi qatarliq Uyghur teshkilatliri téxi yéqinda “Élishqu weqesi” heqqide élan qilghan bayanatlirida rayondiki wehshiyliklerning izchil dawam qiliwatqanliqini tekitlep, dunya jama'etchilikini bu jimjit qirghinchiliqqa diqqet qilishqa chaqirghan.