Майк помпео кәрим мәсимоф билән көрүшкәндә уйғур районидики кишилик һоқуқ кризисини оттуриға қойған

Мухбиримиз әркин
2019-04-29
Share

Америка ташқи ишлар министири майк помпео 26‏-апрел күни қазақистан президентиниң алаһидә вәкили, қазақистан дөләт хәвпсизлик комитетиниң секретари кәрим мәсимоф билән вашингтонда көрүшүп, қазақистанда президентлиқ орниниң алмишиши, бу йил 6‏-айда елип берилидиған қазақистан президент сайлими вә шуниңдәк икки дөләтниң террорлуққа қарши һәмкарлиқи мунасивити қатарлиқ мәсилиләрни музакирә қилған.

Америка ташқи ишлар министирлиқиниң язма баянатида қәйт қилинишичә, майк помпео көрүшүштә уйғур районида йүз бериватқан кишилик һоқуқ кризисини оттуриға қоюп, бу кризиста "шинҗаңда яшайдиған нурғун етник қазақлар қурбанлиққа айланди" дегән. Лекин америка ташқи ишлар министирлиқиниң баянатида, помпеониң сөзигә мәсимофниң қандақ инкас қайтурғанлиқи тилға елинмиди.

Қазақистан хитайниң "бир бәлвағ бир йол" истратегийәсидики әң һалқилиқ дөләт болуп, у хитайниң 2 милйондәк уйғур, қазақ вә башқа түркий мусулман хәлқләрни тутқун қилип, лагерларға қамиши, лагер сиртидикиләрни омумйүзлүк тәқиб қилишиға сүкүт қилип кәлгән. Униң уйғур районидики вәзийәткә сүкүт қилиши, уруқ‏-туғқанлири лагерларға қамалған қазақистандики оралман қазақ пуқралириниң наразилиқини қозғап, бу қазақистан һөкүмитини интайин осал әһвалға чүшүрүп қойған иди. Даириләр ахири бу йил 3‏-айда уйғур районидики қазақларниң кишилик һоқуқ давасини қилип келиватқан қазақистандики кишилик һоқуқ тәшкилати "ата-юрт" ниң ишханисини печәтләп, униң рәһбири серикҗан билашоғлини тутқун қилған. Билашоғли "етник өчмәнликкә қутратқулуқ қилиш қилмиши" билән әйиблинип, астанада нәзәрбәнд қилинған иди. Америка ташқи ишлар министирлиқиниң баянатида қәйт қилинишичә, майк помпео мәсимофқа йәнә американиң уйғур районидики бу кризисниң тәсиригә учриғанларни күчлүк рәвиштә қоллайдиғанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт