Уйғур районидики мәҗбурий әмгәкниң көлими зади қанчилик?

Мухбиримиз җәвлан
2021-01-06
Share

Өткән йил тәтқиқатчи адриян зенизниң уйғур районидики мәҗбурий әмгәк тоғрулуқ бәргән доклатида, "мәҗбурий әмгәккә қатнашқанларниң сани аз дегәндә 570 миңдин ашиду" дейилгән болуп, пүткүл уйғур райондики омумий санниң буниңдин нәччә һәссә юқирилиқи пәрәз қилинғаниди.

5-январ американиң даңлиқ таратқулиридин бири болған "аксийос" (Axios) торида "уйғур районидики мәҗбурий әмгәкниң көлими биз билгәндинму кәң" намлиқ мақалә елан қилинған болуп, униңда көрситилишчә, хитай даирлири йеқинқи икки йилда уйғур районида лагерларниң қоршав теми ичидә чоң типтики завутларни қурған һәмдә 3 йилдин буян йүз миңлиған уйғурни пахтизарлиқларда ишләшкә мәҗбурлиған. Буниңдики әң чоң сәвәб, уйғур районида ишләпчиқирилған мәһсулатлар дуняниң һәр қайси җайлиридики мал тәминләш һалқисиниң әң пайда тапидиған түрлиригә айланған.

Мақалидә мундақ дейилгән: "тәтқиқатчиларниң тәкшүрүш доклатидин мәлумки, хитай һөкүмити уйғур деһқанлирини ‹намратлиқтин қутулдуруш' шоари астида иш мәйданлириға топ-топ әвәткән. Әмгәкчиләрни халиған йәргә йөткәш хитай һөкүмитиниң уйғурларни контрол қилиш вә уларни ассимилатсийә қилиштики муһим васитиси болуп қалған".

"базфид" (Buzzfeed) тори елан қилған әң йеңи доклатта билдүрүлүшичә, уйғур районида 100 дин артуқ чоң типтики лагерлар болуп, ичидики завутларниң көлими 21 милйон кувадрат метирдин ашидикән. Бу завутларниң йениға 1500 дин артуқ ширкәт җайлашқан болуп, буниң ичидә нәччә онлиған ширкәт чәт әлләргә мал експорт қилидикән.

Юқириқи мақалиниң ахирида мундақ дейилгән: "йеңи тәкшүрүшләрдин мәлум болдики, хитай һөкүмити уйғур районидики мәҗбурий әмгәкниң көлимини техиму кеңәйтмәктә. Әмма таки бүгүнгичә, дуняниң һәр қайси җайлиридики һөкүмәтләр вә ширкәтләр иқтисадий мәнпәәтни биринчи оюнға қоюп кәлмәктә."

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт