Уйғур мәҗбурий әмгикигә бағлинишлиқ мәһсулатлар вийетнам арқилиқ ғәрбкә тошулмақта

Вашингтондин мухбиримиз әзиз тәйярлиди
2024.02.01

Уйғур дияридики мәҗбурий әмгәк изчил түрдә һәр саһәниң диққитидә болуп келиватқан болуп, йеқиндин буян буниңдики бәзи йочуқлар ашкара болушқа башлиди. Болупму америка һөкүмити “уйғур мәҗбурий әмгикиниң алдини елиш қануни” ни мақуллиғандин буян хитайниң америка таможнисидин өтидиған таварлири бирдәк “уйғур мәҗбурий әмгики билән қисмән яки пүтүнләй бағлинишлиқ әмәслики” ни испатлаш тәләп қилинишқа башлиған.  Нәтиҗидә хитайлар бу һәқтики йочуқларни издәп, тездин вийетнамни буниңдики “оттура бекәт” қиливалған.

Америка таможна вә чегра қоғдаш идарисиниң 26-январда елан қилған мәлуматлирида көрситилишичә, 2023-йили уйғур мәҗбурий әмгики мәсилиси түпәйлидин 10 милйон америка доллири қиммитидики кийим-кечәк вә башқа тоқулма буюмлар америка таможнисида тутуп қелинған;

“кишилик һоқуқни көзитиш тәшкилати” асия бөлүминиң муавин мудири фил робертсон бу һәқтә сөз қилип “бу доклат шуни көрситидуки, һазир шинҗаңдики мәҗбурий әмгәк бәдилигә ишләп чиқирилған таварлар көп миқдарда вийетнамға йөткәп келинип, андин бу җайдин америка базириға йолланмақта” дегән. 

“америка авази” ниң бу һәқтики хәвиридә ейтилишичә, хитай һөкүмити ғәрб дунясиниң уйғур мәҗбурий әмгикигә бағлинишлиқ таварларға болған сәзгүрлүкини нәзәргә елип, нөвәттә мал йоллаш нуқтисини хитайдин башқа бир җайға йөткәшкә башлиған. Буниңда вийетнам вә малайсия муһим рол ойниған. Шу сәвәбтин нөвәттә һәрқайси саһәниң кишилири америка һөкүмитиниң өзиниң вийетнам билән болған дипломатик алақисидин пайдилинип бу хилдики рәзилликкә йол ечип бәрмәслик тоғрисида бесим қилишни тәләп қилған.

31-январ ахирлашқан 2024-йиллиқ “хәлқара диний әркинлик алий кеңиши”диму уйғур мәҗбурий әмгики һәққидики мәсилиләр муһим темилар қатаридин орун алғаниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.