Kanada pénsiye fondi Uyghur qul emgiki mehsulatlirigha meblegh sélishtin chékinidighanliqini bildürgen

Kanada pénsiye fondi meblighi hey'iti, meblegh salghuchilar bilen xitayning Uyghur qul emgiki lagérlirigha chétishliq passip körsetküch fondlirigha meblegh sélishtin chékinip chiqishni sözlishiwatqanliqini bildürgen. Kanadadiki “Muz merkizi kanadaliqlar” namliq teshkilatning ashkarilishiche, bu teshkilatning qurghuchisi we diréktori rik pétérson yéqinda kanada pénsiye fondi meblighi hey'itining yazghan bir parche xétini tapshuruwalghan bolup, bu xette “Xongkong közitish teshkilati” ning ötken hepte élan qilghan bu heqtiki doklatigha inkas bildürülgen. Melum bolushiche, “Xongkong közitish teshkilati” bu doklatta, kanada pénsiye fondining 14 milyard dollarliq körsetküch fondi meblighining Uyghur qul emgiki lagérlirigha chétishliq xitay shirketlirige sélin'ghanliqi pash qilin'ghaniken.

“Muz merkizi kanadaliqlar” teshkilatining bildürüshiche, kanada pénsiye fondi meblighi hey'itining yershari ammiwi ishlar diréktori mishél laduk qelemge alghan bu xette: “Biz meblegh salghan barliq shirketler shundaqla meblegh salghuchi shériklirimiz, jümlidin körsetküch fondi bilen teminligüchiler choqum özlirining tijaritini qandaq élip bérishta kishilik hoquq qatarliq munasiwetlik mesililerni oylishishi kérek, dégen qarishingizgha ortaqlishimiz” déyilgen. Mishél laduk xétide yene mundaq dégen: “Kishilik hoquq bizning organ uzundin buyan diqqet qilip kelgen merkizi nuqta, biz özgirish élip kélidighan purset bar, dep qarighan shirketler bilen hemkarlishimiz. Siz otturigha qoyghan mesililer nahayiti muhim, shu'an sizge bizning meblegh salghuchi shériklirimiz bilen bu mesilini muzakire qiliwatqanliqimizni éytalaymen”.

“Muz merkizi kanadaliqlar” ning éytishiche, bu intayin muhim netije bolup, bu teshkilat ötken yili 11-ayda bu mesilini otturigha qoyghan'gha qeder kanada pénsiye fondi özlirining kishilik hoquqni depsende qilishqa chétishliq shirketlerge biwasite meblegh salmighanliqini ilgiri sürüp kelgeniken.