En'giliye Uyghur mejburiy emgikide ishlen'gen küntaxtilarning tökme bazirigha aylinip qélish xewpige duch kelgen

Washin'gtondin muxbirimiz erkin teyyarlidi
2024.04.01

En'giliye parlamént ezaliri, en'giliyening Uyghur “Qullar emgiki”, yeni Uyghur mejburiy emgikide ishlepchiqirilghan küntaxtilarning tökme qilip sétish bazirigha aylinip qélish xewpige duch kéliwatqanliqidin agahlandurghan.

En'giliye “Télégraf” gézitining xewer qilishiche, en'giliye parlaménti tashqi ishlar alahide komitétining re'isi, awam palata ezasi alisiya krénis (Alicia Kreans) amérika bilen yawropa ittipaqining her ikkisi Uyghur “Qullar emgiki” de ishlepchiqirilghan küntaxta mehsulatlirini chekligenliki, küntaxta mehsulatining texminen 98 pirsenti xitayda ishlepchiqiriwatqan ehwalda, bu küntaxta mehsulatlirining en'giliyege éqip kirishini keltürüp chiqirishi mumkinlikini éytqan. Alisiya krénisning en'giliye üchün intayin halqiliq bir peytte bu agahlandurushni bergenliki qeyt qilinmaqta.

“Télégraf” gézitining bildürüshiche, nöwette en'giliye hökümiti özining quyash énérgiyesi yol xeritisini élan qilish aldida turmaqta iken. Hökümetning quyash énérgiyesi yol xeritiside en'giliyening küntaxta kölimini hazirqi 18 gégawattin 2035-yilghiche 70 gégawatqa chiqirishi pilanlanmaqta iken. Xewerde bu en'giliyening milyonlighan küntaxtilarni orunlashturidighanliqi we bu küntaxtilarning hemmisining xitaydin kélidighanliqidin dérek béridighanliqi qeyt qilinmaqta. En'giliye shéféld hallam uniwérsitéti héléna kénnidi merkizini öz ichige alghan tetqiqat orunlirining bildürüshiche, dunya küntaxta bazirini monopol qilghan xitayning küntaxta ishlepchiqirishi, Uyghur mejburiy emgikige zich baghlinishliq iken. “Télégraf” gézitining qeyt qilishiche, alsiya krénis xitayning küntaxta mehsulatlirini bundaq erzan bahada ishlepchiqirishi peqet keng kölemlik mejburi emgek arqiliqla emelge ashidiken.

Alsiya krénis mundaq dégen: “Küntaxta énérgiyesi Uyghur mejburiy emgikining eng paskina hem jinayet shériki bolghan sana'et türlirining biri. En'giliye qullar emgikide ishlepchiqirighan küntaxtilarning tökme qilip sétish bazirigha aylinip qélish xewpige duch kelmekte.”

Alsiya krénisning éytishiche, en'giliye pakiz énérgiye serpiyatigha ötüshte “Qullar emgikige shérik bolup qélishtin saqlinipla qalmay, irqiy qirghinchiliqqa shérik bolup qélishtinmu saqlinishi kérek” iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.