Amérikadiki quyash énérgiye taxtisi ishlepchiqarghuchilargha mejburiy emgekke tayan'ghan teminlesh zenjirliridin xaliy bolush heqqide bir körsetme tarqitildi

Roytérs agéntliqining xewiridin qarighanda, 29-aprél peyshenbe küni “Amérika quyash énérgiye sana'iti jem'iyiti” amérikadiki quyash énérgiyelik bataréye ishlepchiqarghuchilargha bir yürüsh ixtiyariy körsetme tarqatqan. Ular bu arqiliq amérikidiki quyash énérgiye taxtilirini chet'ellerde mejburiy emgek asasida ishlep chiqirilghan zapchaslardin xaliy qilishni közlimektiken.

Gerche körsetmide xitay mexsus tilgha élinmighan, biraq quyash énérgiye taxtilirida ishlitilidighan xam madda bolghan kök tashning mutleq köp qismini xitay ishlepchiqiridighan bolup, buning birdek Uyghur diyaridin chiqidighanliqi éniqlan'ghan idi. Ilgiri bu heqte blumbérg qatarliq nopuzluq axbaratlarmu xewer bergen bolup, milyonlap lagérgha qamalghan kishilerning nurghunlirining “Kespiy maharet bilen terbiyelep, ishqa orunlashturush” namida emeliyette mushu xildiki mejburiy emgek zawutlirigha yollan'ghanliqi köplep melum bolghan idi.

Mezkur jem'iyetning bazar istratégiyesige mes'ul mu'awin lidiri jon smirnow roytérsqa söz qilip “Biz quyash énérgiyesi teminlesh zenjirliride mejburiy emgek bolushini xalimaymiz, bu heqte éghir endishiler otturigha qoyuldi, biz buninggha choqum estayidil mu'amile qilimiz” dégen.

SEIA “Amérika quyash énérgiye sana'iti jem'iyiti” ötken yilining axirida ezalirini Uyghur rayonidin chékinip chiqishqa chaqirghan we eza shirketlerdin 6-ayghiche öz mehsulatlirining mejburiy emgektin xaliy ikenliki toghrisida kapalet bilen teminlishini telep qilghan idi.