Xitay hökümiti Uyghurlarni mejburiy emgekke séliwatqanliqini yene inkar qildi

Xitay hökümiti Uyghurlarning keng kölemlik mejburiy emgekke séliniwatqanliqigha a'‍it ishenchilik we yéterlik pakitlargha qarimay, mejburiy emgekning mewjutliqini dawamliq inkar qilmaqta. Uyghur aptonom rayonluq hökümet 30-april xitay tashqiy ishlar ministirliqida yene axbarat yighini ‍ötküzüp, Uyghurlarni mejburiy emgekke séliwatqanliqin ret qilghan.

Uyghur aptonom rayonliq hökümetning bayanatchisi shü guyshyangning ‍ilgiri sürishiche, “Shinjang xelq'ara emgek teshkilatining nizamnamisigha izchil emel qilmaqta” iken. Xelq'ara emgek teshkilatining bildürüshiche, xitay hazirgha qeder bu teshkilatning halqiliq kélishimlirige imza qoymighan.

30-April ötküzülgen yighinda Uyghur aptonom rayonliq kiyim-kéchek igiliki jem'iyitining mu'awin bashliqi obulhesen obulqasim we alide tur'exmet isimlik ghuljadiki bir kiyim-kéchek karxanisining ishchisini guwahliq bergüzgen. Alide tur'exmet: “Shinjangdiki her millet xelqi xizmet tallashta erkin. Qeyerge bérip, qandaq xizmet qilishni ö ixtiyarliqi bilen tallaydu,” dégen.

Xitay hökümiti mejburiy emgekning mewjutliqini inkar qilsimu, biraq u xelq'ara emgek nazaret qilish teshkilatlirining tekshürüsh élip bérishini ret qilip keldi. 30-Aprildiki axbarat yighini Uyghur élida ishlepchiqirilghan mehsulatlarni bayqut qilghan shirketler téximu köpiyiwatqan mezgilde ötküzülgen. Yaponiye taratqulirining éytishiche, nöwette téximu köp yaponiye shérkiti Uyghur mejburiy emgiki seweblik xitay shirketlirini bayqut qilishni pilanlimaqta ‍iken.