Sana'etleshken 7 dölet guruhi Uyghur mejburiy emgikige qarshi turushqa chaqirildi

Uyghur mejburiy emgikige qarshi bir xelq'araliq birleshme 23-iyun sana'etleshken 7 dölet guruhining rehberlirige ochuq xet élan qilip, ularni Uyghur mejburiy emgikige qarshi turushqa chaqirghan. 40 Tin artuq dölettiki 400 din artuq teshkilattin teshkil tapqan mezkur xelq'araliq birleshme, 26-iyun küni gérmaniyede bashlinidighan 7 dölet guruhining rehberlirige chaqiriq qilghan. Amérika tashqi ishlar ministirliqining bildürüshiche, prézidént baydénmu qatnishidighan bu yighinning muzakire küntertipi yershari hawa kilimati, ukra'ina urushi, dunya teminlesh zenjiri, ashliq krizisi qatarliq mesililerni ‍öz ichige alidiken.

“Uyghur mejburiy emgikige xatime bérish birleshmisi” ochuq xétide, 7 dölet guruhi rehberlirini Uyghur rayonidiki Uyghur we bashqa türkiy hem musulman xelqlirige qaritilghan mejburiy emgek we éghir kishilik hoquq depsendichiliklirige qarshi turushta konkrét tedbirlerni qollinishqa chaqirghan. Ochuq xette mundaq déyilgen: “Biz silerning import kontrol méxanizmlirini yolgha qoyup we puxta ijra qilish arqiliq Uyghur mejburiy emgikide bulghan'ghan mallarning bazarliringlargha kelkündek éqip kirishini tosup, wedenglargha heqiqiy rewishte emel qilishinglarni chaqirimiz”.

Ochuq xette xelq'ara teminlesh zenjirining kiyim-kéchek, toqumichiliq, ximiye, dorigerlik, aptomobil we yéza igilik qatarliq nurghun saheliride Uyghur mejburiy emgikining ishlitilidighanliqigha da'ir ishenchlik deliller barliqi bildürülgen.

Ochuq xette yene “Hökümetlerning bu mehsulatlarning öz bazarlirigha kirishini tosushi, mejburiy emgek mehsulatlirini nishan qilghan import kontrol tedbirlirining ünümlük bolushi üchün dunyawi hemkarliqning intayin muhim” ikenliki tekitlen'gen.