Американиң “форбес” журнилида уйғур мәҗбурий әмгәк мәһсулатлирини чәкләшни техиму күчәйтиш оттуриға қоюлди

27-Июн күни, американиң “форбес” журнилида елан қилинған бир мақалида, америка хитайниң уйғур мәҗбурий әмгикигә хатимә бериш тиришчанлиқини техиму күчәйтиши тәләп қилинған. Америкадики хадсон институтиниң алий тәтқиқатчиси оливийә енос елан қилған бу мақалида тәкитлинишичә, америка “уйғур мәҗбурий әмгикиниң алдини елиш қануни” ни иҗра қилишқа башлиған 2022-йили 22-июндин буянқи икки йил мабәйнидә йетәрлик санлиқ мәлумат топланған. Һалбуки, топланған бу санлиқ мәлуматлар бу қанунниң иҗра қилиниш тәрәққиятини анализ қилиш, америка вә дуняниң уйғур мәҗбурий әмгикигә үзүл-кесил хатимә беришини күчәйтиштә йәнә қандақ қәдәмләрни бесишни қарар қилишини йетәрлик учур билән тәминлимәктә икән.

Оливийә енос, америка таможнасиниң һазирға қәдәр 3 йерим милярд долларлиқ мални тәкшүргәнлики, 700 милйон долларлиқ малниң америкаға киришини рәт қилғанлиқи, бу қанун америка хәлқини хитайниң уйғур ирқий қирғинчилиқи вә инсанийәткә қарши җинайитигә ихтиярсиз шерик болуп қелиштин сақлашта муһим рол ойниған болсиму, әмма бу тиришчанлиқни йәниму күчәйтишкә тоғра келиватқанлиқини ейтқан. Униң тәкитлишичә, нөвәттики вәзийәт америка вә дуняниң уйғурларға ярдәм бериштә техиму көп ишларни қилишини күтмәктә икән. Оливийә енос, “уйғур мәҗбурий әмгикиниң алдини елиш қануни” ға қайта-қайта хилаплиқ қилғучиларға җәриманә қоюшни, уйғур ирқий қирғинчилиқидин сақ қалғучиларға фонд тәсиси қилишни, шундақла уйғур мәҗбурий әмгикидә ишләпчиқирилған мәһсулатларниң қайта експорт қилинишини чәкләшни оттуриға қойған.

Униң тәкитлишичә, икки йил вақит американиң тәҗрибә-савақларни йәкүнлиши, “уйғур мәҗбурий әмгикиниң алдини елиш қануни” ниң иҗра қилинишини күчәйтидиған қошумчә тәдбирләрни елиши үчүн йетәрлик икән. Олиийә енос, мақалисиниң ахирида, “булар америка һөкүмити қилалайдиған үч иш болсиму, әмма уйғур хәлқи учраватқан зулумларниң ахирлишишиға капаләтлик қилиш үчүн бизниң әң зор тиришчанлиқ көрситишимизгә тоғра келиду” дегән.