Франсийә соти төт кийим-кечәк ширкити үстидин сунулған уйғур мәҗбурий әмгәк әрзини қобул қилған

Мухбиримиз әркин
2021-07-01
Share

Франсийәдики бир сот мәһкимиси юникло вә зарани өз ичигә алған төт атақлиқ кийим-кечәк ширкитиниң уйғур мәҗбурий әмгикидин пайдиға еришкәнликигә аит һәқ тәләп әрзни қобул қилған. Бу һазирға қәдәр чәт әлләрдә уйғур мәҗбурий әмгикидин пайдиға еришиш билән әйиблинип ечилған тунҗи дава болуп һесаплиниду.

Франсийә агентлиқиниң хәвәр қилишичә, париж дөләтлик терорлуққа қарши туруш тәптиш мәһкимисидики сотчилар дөләт һалқиған ширкәтләрниң инсанийәткә қарши туруш җинайитигә четишлиқ икәнликигә даир әрзни тәкшүрүшкә башлиғанлиқини дәлиллигән.

Бу дело бу йил 4-айда шәрпа чирикликкә қарши туруш гурупписи, пакиз кийим-кечәк һәрикитиниң франсийә тармиқи, явропа уйғур институти вә хитай лагерида йетип чиққан франсийәдики бир уйғур аялниң әрзигә асасән турғузулған.

Франсийә агентлиқиниң хәвиридә ейтилишичә, әрздарлар индитекис, испанийәниң зара шундақла юникло, франсийәниң даңлиқ кийим-кечәк гуруһи болған SMCP вә даңлиқ аяқ кийим ширкити скәчерни "шинҗаң пахтиси" ишлитиш билән әйиблигән.

‍Өткән йили найке, юникло, H&N яки адидасни ‍өз ичигә алған бир қанчә даңлиқ хәлқара маркилар баянат елан қилип, "шинҗаң пахтиси" ни ишләтмәйдиғанлиқини җакарлап, хитайниң байқут қилишиға учриған, һәтта бәзи ширкәтләр баянатини қайтуривалған иди. Америка һөкүмити илгири бу даңлиқ хәлқара маркиларни уйғур мәҗбурий әмгикигә четилип қалмаслиқини, униңға четилип қелишниң иқтисадий һәм қануний җавабкарлиқи болидиғанлиқини агаһландурған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт