"уйғур мәҗбурий әмгикиниң алдини елиш қанун лайиһәси" америка кеңәш палатасида мақуллуқтин өтти

Мухбиримиз ирадә
2021-07-15
Share

Америка кеңәш палатаси уйғур елида ишләпчиқирилған һәрқандақ таварниң америкаға киришини чәкләйдиған "уйғур мәҗбурий әмгикиниң алдини елиш қанун лайиһәси" ни мақуллиди.

Ройтерс агентлиқиниң хәвиригә қариғанда, 14-июл күни авазға қоюлған бу лайиһә америка кеңәш палатасида толуқ қоллаш билән аваздин өткән болуп, бу американиң хитай һөкүмитиниң уйғурларға қаратқан ирқий қирғинчилиқи вә мәҗбурий әмгикини чәкләш йолидики муһим қәдәмләрниң бири болуп һесаблинидикән.

"уйғур мәҗбурий әмгикиниң алдини елиш қанун лайиһәси" ни америка кеңәш палата әзаси марко рубийо вә кеңәш палата әзаси җеф мерклей бирликтә тонуштурған. Сенатор марко рубийо бу һәқтики баянатида мундақ дегән: "биз хитай компартийәсиниң инсанийәткә қарши елип бериватқан җинайи қилмишлириға көз юмалмаймиз, шундақла һәрқандақ ширкәтиң бу дәһшәтлик зулумға шерик болуп пайда елишиға йол қоймаймиз".

Сенатор җеф мерклей мундақ дегән: "һечқандақ бир америка ширкити бу зиянкәшликләрдин пайда алмаслиқи керәк. Һечқандақ америкалиқ истемалчи билип-билмәй мәҗбурий әмгәк бәдилигә ишләпчиқирилған мәһсулатларни сетивалмаслиқи керәк."

Мәзкур қанун лайиһәси кейинки қәдәмдә америка авам палатасида авазға қоюлидикән, америкадики һәр икки партийә әзалири бу қанун лайиһәсиниң йоқири аваз билән мақуллинидиғанлиқини мөлчәрлимәктикән.

Америка һөкүмити техи йеқинда уйғур ели вә хитай тәвәсидики җәмий 14 шеркәтни уйғурларға қаритилған ирқий қирғинчилиқта роли бар, дәп җазалиған. Шундақла йәнә уйғур елидики тәминләш зәнҗирлиригә мунасивәтлик йеңи сода көрсәтмиси елан қилип, америка шеркәтлирини уйғур елидики мәҗбурий әмгәккә четилип қелиштин қаттиқ агаһландурған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт