Хитай даирилири уйғурларни хенәндики кәлкүн апитигә ярдәм беришкә давамлиқ мәҗбурий сәпәрвәр қилмақта

2021-07-26
Share

Уйғурларға "ирқий қирғинчилиқ" қилиш, милйонлиған уйғурни лагерларға қамаш вә мәҗбурий әмгәк селиш билән әйиблинип келиватқан хитай даирилириниң уйғурларни хенәндики кәлкүн апитигә ярдәм беришкә давамлиқ сәпәрвәр қиливатқанлиқи мәлум болди. Қумул шәһири өткән һәптә хенәнгә бир милйон нан ярдәм қилидиғанлиқини елан қилип, "қумул тәмлик нан тәрәққият чәклик ширкити" намлиқ навайчилиқ карханисидики уйғур ишчилирини кечиләп исменада ишләшкә сәпәрвәр қилғаниди.

Нөвәттә уйғурларни нишан қилған "қериндашлиқ меһри" ни йәткүзүш намидики бу сәпәрвәрликниң пүтүн уйғур районида қанат яйдурулуватқанлиқи мәлум болди. "шинхуа хәвәрлири" ториниң ашкарилишичә, нөвәттә даириләр пәйзиват наһийәсиниң миша йезисиға қарашлиқ чилақ кәнтидики аһалиләрни кечиләп нан йеқип хенәнгә ярдәм қилиши һәрикитигә сәпәрвәр қилған. Хәвәрдә 5 миң нан басқан тунҗи түркүмдики бир йүк аптомобилиниң 24-июл күни хенәнгә қарап йүрүп кәткәнликини билдүргән.

Мәлум болушичә, бу нанларни мәзкур кәнттики аһалиләр кечиләп тәйярлиған болуп, бу сәпәрвәрликни мәзкур кәнткә чүшкән хизмәт әтрити уюштурғаникән. Хитай даирилириниң 2017-йилидики чоң тутқунда бурун ианә бәргән яки ианә топлап хәйри-сахавәт ишлири билән шуғулланған уйғурларни тутқун қилип, лагерларға қамиши яки қамақ җазалириға һөкүм қилиши, әмди болса уйғурларни хенәндики апәткә мәҗбурий сәпәрвәр қилиши диққәт қозғиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт