Явропа иттипақи хитайниң уйғурларни мәҗбурий әмгәккә селиватқанлиқи сәвәблик "мәҗбурий әмгәк" мәһсулатлирини чәкләйдикән

Мухбиримиз ирадә
2021-09-16
Share

Явропа иттипақи хитай һөкүмитиниң уйғурларға йүргүзүватқан мәҗбурий әмгәк сияситини көздә тутуп туруп, мәҗбурий әмгәк асасида ишләпчиқирилған мәһсутларни чәклимәкчикән.

Фирансийә агентлиқиниң хәвәр қилишичә, явропа иттипақи комиссийониниң рәиси урсула вон дер лейен 15-сентәбир күни парламентта қилған нутуқида явропа иттипақиниң мәҗбурий әмгәк мәһсулатлирини чәкләш үчүн һәрикәткә өтидиғанлиқини дәлиллигән.

Урсула вон дерлейен ханим нутқида мундақ дегән: "явропа иттипақи йәр шари характерлиқ тиҗарәтни қоллисиму, бирақ буни һәргизму кишиләрниң иззәт-һөрмити вә әркинлики бәдилигә йүрүштүрүшкә қарши туриду. Нөвәттә мәҗбурий әмгәккә зорлиниватқан вә униң тәһдитигә учраватқан 25 милйон адәм бар, биз бу кишиләрниң явропадики дуканларда сетиливатқан мәһсулатларни ишләпчиқиришқа мәҗбурланғанлиқини һәргиз қобул қилалмаймиз."

Гәрчә урсула ханим нутуқида хитайниң исмини очуқ тилға алмиған болсиму, бирақ хәлқара ахбарат органлириниң хәвәрлиридә нөвәттә уйғур мәҗбурий әмгәк мәсилисиниң яврупа иттипақи билән хитай арисидики әң муһим темиларниң бири икәнликини тәкитлигән.

Мәлум болушичә, мәҗбурий әмгәк асасидики мәһсулатларни чәкләш һәққидики баянат явропа комиссийониниң рәиси урсула вон дер лейенниң явропа иттипақиниң йиллиқ доклат нутуқида қилған сөзидики бир қанчә муһим ноқтиларниң бири икән. Шуниң билән биргә, урсула вон дер лейенниң парламенттики баянати явропа парламенти сиясийонлириниң явропа иттипақиниң бейҗиңға қаттиқ қол болуши керәкликидәк мәйданини толуқ намайән қилип бәргән болуп, явропа иттипақи һинди-тинч окян райони, йерим өткүзгүч тәминләш зәнҗири вә корона вирусиниң тарқилиш мәнбәсигә аит мәсилиләрдә хитайға кәскин муамилидә болушни көзлимәктикән. Урсула ханимму нутуқида явропа иттипақиниң дуняниң башқа җайлирида, җүмлидин һинди-тинч окян райони вә бейҗиңниң "бир бәлвағ бир йол" қурулуши районида риқабәт характерлиқ сода вә ул әслиһә алақиси орнитишни пиланлиғанлиқини оттуриға қойған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт