Amérika tamozhnisi Uyghur mejburiy emgiki sewebidin DJI shirkitining ademsiz uchqulirini tutup qalghan

Amérika chégra bashqurush we tamozhna idarisi, Uyghur mejburiy emgikige chétishliq bolush endishiliri sewebidin xitayning shénjénni baza qilghan dangliq téxnologiye shirkiti-DJI ning ishlepchiqarghan ademsiz uchqulirini tutup qalghan.

“Roytérs agéntliqi” ning xewer qilishiche, amérika chégra bashqurush we tamozhna idarisining bu herikiti “Uyghur mejburiy emgikining aldini élish qanuni” ning türtkiside élip bérilghan. Yene bir jehettin, bu heriket amérika ana weten xewpsizliki ministirliqining mehsulatlarning kélish menbesini tekshürüsh, bolupmu xitay ishlepchiqarghan ademsiz uchqularning kélish menbesini tekshürüshtin ibaret téximu keng da'irilik herikitining bir qismi iken.

DJI Ademsiz uchqularning amérika tamozhna da'iriliri teripidin tutup qélinishi, amérikaning Uyghurlar eng köp olturaqlashqan wirjiniye ishtatidiki fayirfaks nahiyesi, DJI ademsiz uchqulirini sétiwalmaqchi bolghan, emma fayirfaks nahiyelik hökümetning bu pilani bixeterlik sewebidin amérika dölet mejlisining bezi ezaliri we fayirfaks nahiyesidiki Uyghur jama'itining naraziliqini qozghighan bir peytte yüz bergen.

Melum bolushiche, amérika awam palatasi amérika-xitay riqabiti alahide komitéti re'isi jon molénar bilen bu komitétning nopuzluq ezasi raja krishnamorti yéqinda fayirfaks nahiyelik hökümetke xet yézip, ularni bu pilandin waz kéchishke chaqirghan. “Roytérs agéntliqi” ning bildürüshiche, DJI mal zakaz qilghuchi shirketlerge mektup yézip, özining Uyghur mejburiy emgikige chétishliq ikenlikini ret qilghan. Mektupta, “DJI Shuninggha kapalet bériduki, bizning herqandaq ishlepchiqirish basquchimizda mejburiy emgek yoq” déyilgenliki qeyt qilinmaqta. Lékin kishilik hoquq teshkilatliri we gherbtiki nopuzluq tetqiqat orunlirining ashkarilishiche, DJI Uyghur mejburiy emgikige chétishliq bolupla qalmay, u yene xitay hökümitining Uyghurlarni basturushigha téxnikiliq yardemde bolghan iken.