Amérika emeldari mejburiy emgek mehsulatlirini chekleshke qarshi turmaqchi bolghanlargha agahlandurush bergen

Amérika bu yil 6-aydin bashlap “Uyghur mejburiy emgikining aldini élish qanuni”ni ijra qilip, Uyghur rayonidin kélidighan mejburiy emgek mehsulatlirini import qilishni toxtitish üchün tirishiwatqanda, buninggha qarshi yochuq izdep, bu qanunning ijra qilinishigha tosqunluq qilidighanlarmu peyda bolghan. Bu ehwalgha qarita, amérika emeldarliriningmu küchlük diqqet étibari qozghalghan.

 Amérika dölet xewpsizliki ministirlikining mu'awin minsitiri robért silwérs (Robert Silvers) 16-noyabir küni “Wol-sitrét zhurnili” uyushturghan “Xeter we hemkarliq” témisidiki bir munberde söz qilip: “Amérika xitayning her qaysi jayliridin kélidighan mejburiy emgek mehsulatlirini qattiq tekshüridu we buninggha tosqunluq qilmaqchi bolghanlargha zerbe béridu,  ularning bu jinayetni yoshurush gherizi meghlub bolidu” dégen. 

“Wol-sitrét zhurnili” ning bu heqte bergen xewiride éytilishiche, xitay yillardin béri  Uyghur rayonidin chiqidighan pemidur, paxta mehsulatliri we küntaxta matériyallirini amérikagha éksport qilip kelgen. “Uyghur mejburiy emgikining aldini élish qanuni” ijra qilin'ghandin buyan, amérika tamozhna we chégrani qoghdash idarisi 20-séntebirgiche xitayning yüz milyon dollar qimmitidiki mélini kirgüzmigen.

Robért silwérsning bildürüshiche, buningdin kéyin xitay karxaniliri we amérika soda shirketliri mejburiy emgek qanunining qattiq sinaqlirigha duch kélidiken. Shundaqtimu amérika tamozhnasi ilghar téxnikiliq tekshürüshlerni kéngeytip,  import mallirining mejburiy emgekke chétishliq yaki emeslikini tézdin ayrip chiqip, mallarning kirip-chiqishini rawanlashturidiken, shundaqla karxanilarning mejburiy emgek qanunining qandaq ijra qilinishi toghrisidiki endishisini tügitishige yardem béridiken.