En'giliyede sétiliwatqan italiye shoxla qiyamining “Shinjang shoxlisi” gha chétilidighanliqi texmin qilinmaqta

BBC Xewer qanilining 1-dékabirdiki xewiride éytilishiche, en'giliyening bir nechche talla bazirida sétiliwatqan “Italiye shoxla (pemidur) qiyami” ning xitaydiki mejburiy emgekke chétishliq shoxla mehsulatini menbe qilghanliqi heqqide köpligen gumanlar otturigha chiqqan.

BBC Muxbirining bayqishiche, tésko (Tesco) talla bazirida sétiliwatqan “Italiye shoxla qiyami” bilen asda (Asda) talla bazirida sétiliwatqan italiye markisidiki shoxla qiyamining qoyuqluq derijisi oxshimaydiken, emma her ikkisige “Italiyede östürülgen shoxla qiyami” dégen chüshendürüshler yézilghan.

En'giliye bilen gérmaniyediki talla bazarlirida sétiliwatqan 17 türlük shoxla qiyamining bezilirige xitay shoxlisi arilashqan, dégen guman tüpeylidin BBC shirkiti ularni sinaq qilishqa tapshurghan.

Xewerde déyilishiche, xitaydin kéliwatqan shoxla mehsulatining mutleq köp qismi “Shinjang shoxlisi” bolup, bu shoxlini ishlepchiqirishqa köp sanda Uyghur we bashqa milletlerdin bolghan emgek küchlirining mejburiy emgekke sélin'ghanliqi ashkarilan'ghan bolsimu, xitay buni izchil inkar qilip kelmekte. BBC Ziyaret qilghan 14 kishi ötken 16 yilda shoxla meydanlirida körgen mejburiy emgek zulumlirini anglatqan.

BBC Muxbirliri yene, zor miqdardiki “Shinjang shoxlisi” ning poyizgha bésilip, qazaqistan, ezerbeyjan we giruziyedin ötüp, italiyege mangdurulghanliqini bayqighan. Italiyediki bir shoxla shirkiti 2020-yildin 2023-yilghiche xitaydin 36 milyon kilogiram shoxla sétiwalghan hemde öz shirkiti namida shoxla qiyami ishlep bazargha salghan. Ularning malliri pütün yawropa bazirigha, jümlidin en'giliye we gérmaniyege mangdurulghan.

BBC Shirkiti en'giliye, gérmaniye we amérika bazarlirida sétiliwatqan 64 xil shoxla qiyamini “Italiye shoxla qiyami” bilen sélishturup analiz qilishni awstraliyediki “Ishenchlik menbe” (Source Certain) shirkitige hawale qilghan.