Amérika kéngesh palatasining maliye komitéti aptomobil sahesining Uyghur mejburiy emgiki bilen bolghan alaqisige diqqet qozghidi

Dunyadiki dangliq aptomobil shirketlirining asasen hemmisining Uyghur mejburiy emgek mehsulatlirigha chétishliq ikenliki heqqidiki yéqinda élan qilin'ghan bir doklat amérika kéngesh palatasi maliye komitétining diqqitini qozghighan. “Üptomobil xewerliri” gézitining bildürüshiche, amérika kéngesh palatasining maliye komitéti hemmebap mator, tésla, ford we xonda qatarliq aptomobil shirketlirige xet yézip, ularning xitay teminlesh zenjiri bilen bolghan alaqisige da'ir so'allargha jawab bérishini telep qilghan.

Kéngesh palatasi maliye komitétining re'isi ron waydén bu shirketlerning ijra'iye diréktorlirigha yazghan xétide, “Aptomobil ishlepchiqarghuchilarning shinjanggha chétishliq barliq mal teminligüchiler bilen bolghan munasiwitini tekshürüshining intayin muhim” ikenlikini éytqan. “Üptomobil xewerliri” ning éytishiche, waydénning xéti toyota, wolkiswagén, krislérning igisi bolghan stéllantis shirkiti we mérsidis-béniz shirketlirining mes'ullirighimu ewetilgen.

Waydénning xétide: “Inchikilik bilen tekshürüsh basquchi zapchaslarning mejburiy emgek bilen munasiwiti yoqlighini ispatlimighuche, aptomobil ishlepchiqarghuchilarning aptomobillirini amérikada sétishigha bolmaydu yaki satmasliqi kérek, bu shinjangda qézilghan we yasalghan aptomobil parchilirinimu öz ichige alidu” déyilgen.

“Aptomobil xewerliri” gézitining éytishiche, ron waydénning aptomobil ishlepchiqarghuchilarning “Shinjanggha chétishliq xam eshya, kan mehsulatliri, pishshiqlap ishlesh yaki parche zapchaslarni ishlitishi seweblik” herqandaq bir mal teminligüchining mehsulatini bikar qilghan yaki toxtatqan-toxtatmighanliqini bilgüsi bar iken. Ron waydén xétide, en'gliyediki shéffild hallam uniwérsitéti tetqiqatchilirining yéqinda élan qilghan aptomobil sana'itining asasen hemmisi Uyghur rayonida ishlepchiqirilghan polat, alyumin, mis, bataréye, éléktronluq zapchas we bashqa üskünilerni ishlitidighanliqi heqqidiki doklatini neqil keltürgen.