Хәлқара олимпик комитети уйғур дияридики хитай ширкити билән кийим тохтами түзгән

Мухбиримиз әзиз
2021-12-29
Share

Йеқинда хәлқара олимпик комитетиниң 2021-йилидики токйо язлиқ олимпик мусабиқиси вә 2022-йилидики бейҗиң қишлиқ олимпик мусабиқиси үчүн уйғур дияридики бир қисим хитай ширкәтлири билән олимпик тәнһәрикәт кийими тикиш тохтами түзгәнлики ашкариланди.

Axios Ториниң 28-декабирдики хәвиридә ейтилишичә, бу ширкәтләрниң ишлитиватқини уйғур дияридики пахта мәһсулатлири болуп, буларниң уйғур мәҗбурий әмгики билән зич бағлинишлиқ икәнлики йеқинқи мәзгилләрдә зор ғулғулиға сәвәб болуватқаниди. Болупму шулар қатаридики “хеңюәншяң” ширкити олимпик комитети үчүн олимпик формисини тикип бериш тохтамиға қол қойған болуп, уларниң хәлқара олимпик комитети билән болған мунасивити 2008-йилидики бейҗиң олимпик мусабиқисидин буян изчил давам қилип кәлгәникән. Мәзкур ширкәт билән қоюқ алақидә болуватқан әң чоң тор содиси мунбири тавбав ширкити болса уйғур дияридики пахта мәһсулатлири көпләп сетилидиған сорунларниң бири икән.

Хәлқара әмгәкчиләр һәқлири бирләшмисиниң тәтқиқатчиси пенелоп кийритис бу һәқтә сөз қилип “хәлқара олимпик комитети уйғур районида мәһсулат ишләпчиқириватқан ширкәтләр билән алақидә болмаслиқи керәк иди. Уларниң бу һәрикити ашу мәһсулатларға шерик болуштин башқа хәлқарада йәнә буниң еланини қилип бәргәнликкә баравәр” дегән. Әмма “хеңюәншяң гуруһи” ниң баянатчиси бу һәқтики соалларға җаваб берип; “биз хәлқара олимпик комитети үчүн тәйярлап бәргән кийимләргә ишлитилгән пахта дөлитимизниң сиртидики җайлардин импорт қилинған” дегән. Әмма бу мәһсулатларниң импорт қилинишиға даир һөҗҗәт яки гуваһнамиләрни көрситип берәлмигән. Кишилик һоқуқни көзитиш тәшкилати хитай бөлүминиң директори софей речардсон ханим бу әһвални әйибләп: “хәлқара олимпик комитетиниң уйғур мәҗбурий әмгикигә бағлинишлиқ хитай ширкити билән кийим тикиш тохтами түзүши бәкму номуслуқ бир қилмиш. Әслидә улар буниң әксини қилса болатти” дәп көрсәткән.

Хәлқара олимпик комитетиниң бу хилдики қилмишлири көп болғанлиқтин бейҗиң қишлиқ олимпик мусабиқиси изчил һәр саһәниң кәскин тәнқидлиригә, шуниңдәк бир қисим һөкүмәтләрниң байқут қилишиға дуч кәлгәниди. 29-Декабир күни “йәһудийлар дуняни көзитиш тәшкилати” өзлириниң тиветтир бетидә учур йоллап “1936-йили натсистлар германийәси олимпик мусабиқисини тәшвиқат қорали қилип җаза лагерлирида йәһудийларни қирғин қилғаниди. Милйонларчә уйғурни җаза лагерлириға қамап болған хитай компартийәси 2022-йили олимпик мусабиқисини йәнә бир қетим тәшвиқат қорали қилмақчи болуватиду” деди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт