Ню-йорк вақти гезити: «хитай уйғурларни әрзан баһалиқ ишчилар қошуни болушқа мәҗбурлимақта»

Мухбиримиз әркин
2019-12-31
Елхәт
Пикир
Share
Принт

«Ню-йорк вақти» гезити 30‏-декабир күни хәвәр берип, хитайниң уйғурларни мәҗбури әрзан баһалиқ ишчилар қошуниға айландуриватқанлиқи, рәт қилғанларниң җазалинидиғанлиқини билдүрди. Хәвәрдә баян қилинишичә, «нөвәттә хитай компартийәси шинҗаңдики аз санлиқ милләтләрни өзигә садиқ йешил яқилиқ ишчиларға айландуруп, хитай карханилирини әрзан баһалиқ әмгәк күчи билән тәминләшни үмид қилмақта» икән. Хәвәрдә, буниң үчүн хитай кадирлириниң очуқ-ашкарә вә җиддий йолйоруқларни бериватқанлиқи, йәрлик мусулман йеза аһалилириниң халисун яки халимисун ишчилиққа мәҗбурлиниватқналиқи тәкитләнгән. Хәвәрдә қәйт қилинишичә, җайларға сан чүшүрүп берилгән болуп, әгәр улар рәт қилса аилиси җазалиндикән. Хәвәрдә, чапчал наһийәлик әмгәк идарисиниң өткән йили чүшүргән бу һәқтики бир һөҗҗити нәқил кәлтүрүлгән болуп, униңда «ишләшни халимиғанларниң өзлиридики шәхсийәтчил идийәни әйиблиши» тәләп қилинған.

Көзәткүчиләрниң илгири сүрүшичә, «ню-йорк вақти» гезитиниң мәзкур хәвири йеқинда ашкариланған хитайниң лагирдики вә лагер сиртидики уйғурларни «ишқа орунлаштуруш» намида райондики яки районниң сиртидики хитай карханилириға кәң көләмлик йөткәп, мәҗбури әмгәккә селиватқанлиқиға даир доклатлар билән бирдәликкә игә икән. Йеқинда италийәдики «зимистан» намлиқ диний әркинлик тори хитайниң лагердики нурғун уйғурни фуҗйән өлкисидики завут-карханиларда мәҗбури әмгәккә селиватқанлиқини билдүргәниди.

«Ню-йорк вақти» гезитиниң тәктилишичә, чапчал наһийәлик әмгәк идарисиниң һөҗҗити хитайниң «шинҗаңдики уйғур вә қазақ қатарлиқ мусулман милләтләрни кархана ишчилириға айландуруштин ибарәт радикал һәрикитиниң бир қисми» икән. Хәвәрдә, бу хил әмгәк программиси хитай рәһбири ши җинпиңниң мәзкур районға болған контроллуқни күчәйтиш үчүн елип бериватқан зор пиланиниң бир ипадиси» икәнлики билдүрүлгән.

Пикирләр (0)
Share
Толуқ бәт