Nyu-york waqti géziti: "Xitay Uyghurlarni erzan bahaliq ishchilar qoshuni bolushqa mejburlimaqta"

Muxbirimiz erkin
2019-12-31
Élxet
Pikir
Share
Print

"Nyu-york waqti" géziti 30‏-dékabir küni xewer bérip, xitayning Uyghurlarni mejburi erzan bahaliq ishchilar qoshunigha aylanduriwatqanliqi, ret qilghanlarning jazalinidighanliqini bildürdi. Xewerde bayan qilinishiche, "Nöwette xitay kompartiyesi shinjangdiki az sanliq milletlerni özige sadiq yéshil yaqiliq ishchilargha aylandurup, xitay karxanilirini erzan bahaliq emgek küchi bilen teminleshni ümid qilmaqta" iken. Xewerde, buning üchün xitay kadirlirining ochuq-ashkare we jiddiy yolyoruqlarni bériwatqanliqi, yerlik musulman yéza ahalilirining xalisun yaki xalimisun ishchiliqqa mejburliniwatqnaliqi tekitlen'gen. Xewerde qeyt qilinishiche, jaylargha san chüshürüp bérilgen bolup, eger ular ret qilsa a'ilisi jazalindiken. Xewerde, chapchal nahiyelik emgek idarisining ötken yili chüshürgen bu heqtiki bir höjjiti neqil keltürülgen bolup, uningda "Ishleshni xalimighanlarning özliridiki shexsiyetchil idiyeni eyiblishi" telep qilin'ghan.

Közetküchilerning ilgiri sürüshiche, "Nyu-york waqti" gézitining mezkur xewiri yéqinda ashkarilan'ghan xitayning lagirdiki we lagér sirtidiki Uyghurlarni "Ishqa orunlashturush" namida rayondiki yaki rayonning sirtidiki xitay karxanilirigha keng kölemlik yötkep, mejburi emgekke séliwatqanliqigha da'ir doklatlar bilen birdelikke ige iken. Yéqinda italiyediki "Zimistan" namliq diniy erkinlik tori xitayning lagérdiki nurghun Uyghurni fujyen ölkisidiki zawut-karxanilarda mejburi emgekke séliwatqanliqini bildürgenidi.

"Nyu-york waqti" gézitining tektilishiche, chapchal nahiyelik emgek idarisining höjjiti xitayning "Shinjangdiki Uyghur we qazaq qatarliq musulman milletlerni karxana ishchilirigha aylandurushtin ibaret radikal herikitining bir qismi" iken. Xewerde, bu xil emgek programmisi xitay rehbiri shi jinpingning mezkur rayon'gha bolghan kontrolluqni kücheytish üchün élip bériwatqan zor pilanining bir ipadisi" ikenliki bildürülgen.

Toluq bet