Американиң баҗ кәчүрүмигә еришкән бир күнтахта завути мәҗбурий әмгәккә васитилик четилип қалған

Американиң җорҗия иштатида күнтахта ясайдиған завут қурған хәнва (Hanwha) ширкити американиң 230 милйон долларлиқ федирал баҗ кәчүрүмигә еришкән. Мушундақ маңса, 2032-йилиға барғанда 900 милйон долларлиқ кәчүрүмгә еришидикән. Әмма бу ширкәтниң мал тәминлигүчиси хитайдики мәҗбурий әмгәккә четишлиқи болған бир ширкәт икән.

“бломберг хәвәрлири” ториниң 9-июл бу һәқтә бәргән хәвиридә ейтилишичә, җәнуби корейәниң хәнва ширкити 2019-йил җорҗия иштатиға Qcells күнтахта завути қуруп иш башлиған болуп, өткән йил ишләпчиқириш миқдарини бир қатлиған, әмма улар күнтахтиниң асаслиқ материялини хитайдин әкәлдүргән. Илгири мәлум болмиған хитай һөҗҗәтлиридә ашкарилинишичә, хәнва ширкитигә мал тәминләйдиған икки хитай ширкити америка һөкүмити уйғур елидики мәҗбурий әмгәккә четишлиқ дәп чәклигән ширкәтләрдин киристаллиқ киримний сетивалған. Американиң қануниға көрә, мал тәминләш зәнҗиригә четилған һәр қандақ хитай ширкитиниң мели америкаға кирәлмәйдикән.

Хәнва ширкитиниң Qcells күнтахта завути байдин һөкүмити тәрәққий қилдурмақчи болған йешил енергийә кәсиплири пиланиниң ичидә икән. Гәрчә бу ширкәт мәҗбурий әмгәк амиллиридин йирақ туридиғанлиқиға капаләт бәргән болсиму, өзиниң мәһсулатиға хитайдин сетивалған киристаллиқ киримний ишләткәнлики һәққидики учурларни ашкарилимиған.

Хәвәрдә көрситилишичә, Qcells күнтахта завути америкадики туралғу өй вә сода биналирини күнтахта билән тәминләйдиған әң чоң орун болуп, тесла ширкитиниң күнтахта мулазимити үчүнму мәһсулат тәминләйдикән. Әмма хитай ширкәтлири уларни материял билән тәминләйдикән. Күнтахта саһәсидики көзәткүчиләр америка таможна вә чегра қоғдаш идарисини уларни тәкшүрүшкә чақирған.

Мәлуматларға қариғанда, нөвәттә хитайда ишләпчиқирилған киристаллиқ киримни дуня базириниң 80 пирсәнтини игилигән болуп, униң үчтин бири уйғур районида ишлинидикән. Америка һөкүмити уйғур районида ишләнгән күнтахта вә униңға мунасивәтлик материялларни мәҗбурий әмгәккә четишлиқ мәһсулат дәп бекиткән вә 2022-йил 6-айдин башлап америка базириға киришини чәклигәниди.