Сенатор марко рубийо уйғур мәҗбурий әмгики мәһсулатлирини сетиватқан “тему” вә “шийин” ни тәкшүрүшни тәләп қилған

Вашингтондин мухбиримиз ирадә тәйярлиди
2024.04.18

Америка кеңәш палата әзаси марко рубийо америка һөкүмитини хитайниң “тему” вә “шийин” намлиқ парчә сетиш тор бәтлирини тәкшүрүшкә чақирған.

Сенатор марко рубийо 16-април күни америка ана вәтән хәвпсизлики министирлиқи (DHS) ниң министири алехандро майоркас (Alejandro Mayorkas) қа хәт әвәтип, униңдин хитайниң “шейин” вә “тему” тор бәтлирини тәкшүрүшини тәләп қилған. У хетидә, “нурғун хусусий органлар вә журналистларниң ‛шейин‚ билән ‛тему‚ ниң уйғур мәҗбурий әмгики билән ясалған таварларниң америка базириға киришигә йол ечип бериватқанлиқиға даир қайил қиларлиқ пакитларни байқиғанлиқи” ни әскәрткән. У, “мәҗбурий әмгәккә тақабил туруш хизмитини иҗра қилиш гурупписиниң ‛уйғур мәҗбурий әмгикиниң алдини елиш қануни‚ бойичә чәклинидиған ширкәтләр тизимликигә йеңи орунларни қошидиған вақти кәлди, ” дәп тәкитлигән.

У мундақ дегән: “‛шийин‚ билән ‛тему‚ ниң америкадики сода йочуқлирини очуқ-ашкара експлататсийә қилиши вә бу ширкәтләрниң мәҗбурий әмгәк билән ясалған таварларни импорт қилишни қолайлаштуруватқанлиқидәк еһтималлиқни нәзәрдә тутуп, мән сизниң бу ширкәтләрни дәрһал тәкшүрүшиңиз һәмдә уларни федиратсийә қануниға хилаплиқ қилиш билән қара тизимликкә елишиңизни тәләп қилимән. ”

Хитайниң “тиму” вә “шийин” қатарлиқ парчә сетиш тор бәтлириниң америка таможнасиниң қиммити 800 доллардин төвән йолланмиларни тәкшүрмәслик һәққидики қаидисидин пайдилинип, мәҗбурий әмгәк билән булғанған мәһсулатларни америкалиқ истемалчиларға сетиватқанлиқи күчлүк диққәт қозғаватқан мәсилә болуп қалған иди. Бу саһәгә мунасивәтлик шәхс вә орунларниң һазир америка қанунидики бу йочуқни етиш үчүн актип һәрикәт қиливатқанлиқи мәлум.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.