Sénator marko rubiyo Uyghur mejburiy emgiki mehsulatlirini sétiwatqan “Tému” we “Shiyin” ni tekshürüshni telep qilghan

Amérika kéngesh palata ezasi marko rubiyo amérika hökümitini xitayning “Tému” we “Shiyin” namliq parche sétish tor betlirini tekshürüshke chaqirghan.

Sénator marko rubiyo 16-april küni amérika ana weten xewpsizliki ministirliqi (DHS) ning ministiri aléxandro mayorkas (Alejandro Mayorkas) qa xet ewetip, uningdin xitayning “Shéyin” we “Tému” tor betlirini tekshürüshini telep qilghan. U xétide, “Nurghun xususiy organlar we zhurnalistlarning ‛shéyin‚ bilen ‛tému‚ ning Uyghur mejburiy emgiki bilen yasalghan tawarlarning amérika bazirigha kirishige yol échip bériwatqanliqigha da'ir qayil qilarliq pakitlarni bayqighanliqi” ni eskertken. U, “Mejburiy emgekke taqabil turush xizmitini ijra qilish guruppisining ‛Uyghur mejburiy emgikining aldini élish qanuni‚ boyiche cheklinidighan shirketler tizimlikige yéngi orunlarni qoshidighan waqti keldi, ” dep tekitligen.

U mundaq dégen: “‛shiyin‚ bilen ‛tému‚ ning amérikadiki soda yochuqlirini ochuq-ashkara éksplatatsiye qilishi we bu shirketlerning mejburiy emgek bilen yasalghan tawarlarni import qilishni qolaylashturuwatqanliqidek éhtimalliqni nezerde tutup, men sizning bu shirketlerni derhal tekshürüshingiz hemde ularni fédiratsiye qanunigha xilapliq qilish bilen qara tizimlikke élishingizni telep qilimen. ”

Xitayning “Timu” we “Shiyin” qatarliq parche sétish tor betlirining amérika tamozhnasining qimmiti 800 dollardin töwen yollanmilarni tekshürmeslik heqqidiki qa'idisidin paydilinip, mejburiy emgek bilen bulghan'ghan mehsulatlarni amérikaliq istémalchilargha sétiwatqanliqi küchlük diqqet qozghawatqan mesile bolup qalghan idi. Bu sahege munasiwetlik shexs we orunlarning hazir amérika qanunidiki bu yochuqni étish üchün aktip heriket qiliwatqanliqi melum.