En'gliyelik adwokatlar ormanchiliq nazaritining sabiq naziri memet abdullaning mesilisini b d t gha élip bardi

Muxbirimiz erkin
2020-07-24
Élxet
Pikir
Share
Print

"Chet'elde adalet" namliq en'gliyediki bir adwokatlar teshkilati b d t ning xalighanche tutqun qilishqa qarshi turush xizmet guruppisigha erz sunup, Uyghur aptonom rayonluq ormanchiliq nazaritining naziri memet abdullaning mesilisini tekshürüshi we uning derhal qoyup bérilishini telep qilghan.

Mezkur teshkilatning 24-iyul élan qilghan bayanatida tekitlishiche, adwokat maykél polak "B d t ning mezkur organining memet abdullaning délosini tekshürüp, 71 yashliq bu bowayni qoyup bérishni telep qilishi, xitay da'irilirining uni qoyup bérishige türtke bolush ümidi peyda qilidu," dégen.

Sabiq nazir memet abdulla xitay hökümitining 2017-yili bashlan'ghan chong tutqunida qolgha élinip, ötken yili muddetsiz qamaqqa höküm qilin'ghanliqi ashkarilan'ghan. Xitayning mezkur tutqunida Uyghurlarni asas qilghan 3 milyondek yerlik xelq lagérlargha qamilip, nurghun Uyghur kadirlar, ziyaliylar, diniy zatlar, tijaretchiler we jama'et erbabliri basturulush nishanigha aylan'ghan. Adwokat maykél polakning tekitlishiche, xitay hökümiti uni perzentlirining amérikada yashaydighanliqi seweblik tutqun qilghan iken.

Adwokat polak bayanatida xitayda a'ilisi chet'elde yashaydighan Uyghur we bashqa türkiy xelqlerning tutqun qilinishi yaki göröge tutulushi omumyüzlük hadise ikenlikini tekitlep: "Dunya axiri Uyghurlargha néme ishlarning boluwatqanliqida oyghandi. Shinjang Uyghur aptonom rayonluq da'iriler memet ependiningkige oxshash mesililerde diqqetning ulargha buralghanliqini hés qilishi, memet ependi a'ilisi bilen jem bolushi, sewebsiz qorqunchluq shara'itta tutup turulmasliqi kérek," dégen.

Toluq bet