Messi (Messi)ning xongkongda top musabiqisige chüshmesliki xitay taratqulirida tenqidlen'gen

Dunyagha dangliq putbol cholpini li'onél messi (Lionel Messi) xongkongdiki bir meydan top musabiqiside meydan'gha chüshmey, yaponiyediki dostluq musabiqiside top oynishi, xitayning küchlük naraziliqigha duch kelgen. Xitay putbol mestaniliri messining herikitini “Qesten qilin'ghan haqaret” dep qarighan.

BBC Ning xewirige qarighanda, messining bu herikitige p xitay top mestanilirila emes, belki xongkong hökümet da'iriliri we xongkong parlamént ezalirimu inkas qayturghan.

Xitay kompartiyesining awazi bolghan “Yer shari waqti géziti” bolsa putbolchi messi we u top oynaydighan “Intér mayami” (Inter Miami) kulubini eyiblep, buning “Xongkongning yüzige dagh chüshürüshni meqset qilghan siyasiy gherezlik heriket” ikenlikini ilgiri sürgen.

Xitayning “Yer shari waqti géziti” mundaq dep yazghan: “Bir qisim chong quruqluq mestaniliri ta shinjangdin xongkonggha 12 sa'et musapini bésip messini körüsh üchün barghan idi. Shunga hökümetning we top mestanilerning ümidsizlinishini chüshinishke bolidu. Bu weqening tesiri tenterbiye sahesidin xélila éship ketti.”

BBC Ning déyishiche, messi 4-féwral küni xongkongda musabiqe bashlinishqa on minut qalghanda yarilan'ghanliqini éytip, musabiqe boyiche meydandiki orunduqtin qopmighan. Biraq u 3 kündin kéyin tokyodiki dostluq musabiqiside top oynighan.

Xongkong tenterbiye meydanidiki texminen 38 ming top mestanisi yekshenbe künidiki musabiqe axirlashqanda “Intér mayami” kulubidin bélet pulini qayturup bérishni telep qilghan. Melum bolushiche, xitay top mestaniliri 36 yashliq argéntinaliq derijidin tashqiri cholpanni körüsh üchün 4880 yüen xongkong puli, yeni 624 dollar töligen iken.

BBC Ning déyishiche, messi ötken yili béyjingda ötküzülgen bir dostluq musabiqisi üchün barghanda intayin qizghin kütüwélin'ghan. Messi oxshash waqitta yene xitayning xu'awéy, chéri, téngshün, méngnyu, chishüy deryasi üzüm hariqi we J&T Express qatarliq xitay markiliriningmu obraz wekili iken. Halbuki, u bu qétim xongkong da'irilirining héch bolmighanda sehnige chiqip tamashibinlargha salam bérip qoyush we longqa tapshuruwélish teleplirigimu qoshulmighan. Xongkongning bash ijra'iye emeldari jon li musabiqe teshkilligüchilerdin chüshendürüsh telep qilghan.