Америка ташқи ишлар министири уйғурларниң вәзийитидин қайғурғанлиқини ипадә қилған бәһрәйингә тәшәккүр билдүрди

Мухбиримиз ирадә
2020-01-08
Елхәт
Пикир
Share
Принт

Америка ташқи ишлар министири майк помпейо 7-январ күнидики ахбарат елан қилиш йиғинида уйғурларниң мәсилиси һәққидә мәхсус тохталди.

У, дуня күн тәртипидики қизиқ мәсилиләргә қарита американиң позитсийәсини елан қилидиған бу йиғинда уйғурларниң вәзийити һәққидә ипадә билдүргән бәһрәйин вәкилләр кеңишини тилға елип мундақ деди: 

«Негизлик кишилик һоқуқ мәсилисигә кәлсәк, мән алди билән бу йәрдә бәһрәйин вәкилләр кеңишини тәқдирләп өтмәкчимән. Улар, 2-январ күни баянат елан қилип, хитай һөкүмитиниң уйғур мусулманлириға қаратқан инсан қелипидин чиққан сиясәтлиригә қарита әндишилирини ипадә қилди. Бәһрәйин, мән бир қанчә айлардин бери дәп келиватқан бу әмәлийәтни муәййәнләштүрди.»

Майк помпейо сөзини йәнә мундақ давам қилди: «хитай коммунистик партийәси тутқундики уйғур, қазақ, қирғиз вә башқа мусулман милләтләргә қарши зор көләмлик кишилик һоқуқ дәпсәндичилики вә зулум йүргүзүватиду. Биз, бәһрәйинниң һәрикитидин мәмнун болуш билән биргә, барлиқ дөләтләрни болупму ислам һәмкарлиқ тәшкилати вә әрәб дөләтлири бирләшмисигә әза дөләтләрни хитай компартийәсиниң уйғурларға қиливатқан залимларчә һәрикәтлирини, җүмлидин уларниң етиқадиға қиливатқан һуҗуминиң бир қисми һесаблинидиған юқиридики бу һәрикәтлирини қаттиқ әйибләшкә чақиримиз». 

Бәһрәйин хәвәр агентлиқиниң билдүрүшичә, 2-январ күни бәһрәйн дөләт миллий мәҗлисиниң вәкилләр кеңиши, йәни мәҗлис төвән палатаси уйғурлар һәққидә баянат елан қилған. Улар баянатта: «вәкилләр кеңиши хитай һөкүмитиниң уйғур мусулманлириға қаратқан зор көләмлик тутқун һәрикити, бир милйондин ошуқ кишиниң лагерларға қамилиши, уларниң балилири, аяллири вә аилисидин җуда қилиниши, негизлик һәқлириниң рәт қилиниши, қейин-қистақ вә өлүмгә дучар болуштәк инсан қелипидин чиққан, залим сиясәтлиригә қарита чоңқур әндишә қилмақта» дейилгән. Вәкилләр кеңиши баянатида йәнә «хәлқара җәмийәтни мәсулийәтни ада қилип, уйғур мусулманлириға қаритилған зулумни ахирлаштуруш, уларни хәлқарадики мунасивәтлик қанунларға асасән қоғдаш, уларниң хатирҗәм һаятини давамлаштурушини капаләткә игә қилиш, халиғанчә тутқун һәрикәтлириниң қайта йүз бәрмәсликигә капаләтлик қилиш» ни тәкитлигән. 

Алдинқи ай, кувәйт парламентиниң 27 нәпәр парламент әзаси кувәйт һөкүмитини хитайдики уйғур мусулманлири вә һиндистандики мусулманларниң әһвалиға көңүл бөлүшкә чақирип имзалиқ баянат елан қилғаниди.

Пикирләр (0)
Share
Толуқ бәт