Amérika tashqi ishlar ministiri Uyghurlarning weziyitidin qayghurghanliqini ipade qilghan behreyin'ge teshekkür bildürdi

Muxbirimiz irade
2020-01-08
Élxet
Pikir
Share
Print

Amérika tashqi ishlar ministiri mayk pompéyo 7-yanwar künidiki axbarat élan qilish yighinida Uyghurlarning mesilisi heqqide mexsus toxtaldi.

U, dunya kün tertipidiki qiziq mesililerge qarita amérikaning pozitsiyesini élan qilidighan bu yighinda Uyghurlarning weziyiti heqqide ipade bildürgen behreyin wekiller kéngishini tilgha élip mundaq dédi: 

"Négizlik kishilik hoquq mesilisige kelsek, men aldi bilen bu yerde behreyin wekiller kéngishini teqdirlep ötmekchimen. Ular, 2-yanwar küni bayanat élan qilip, xitay hökümitining Uyghur musulmanlirigha qaratqan insan qélipidin chiqqan siyasetlirige qarita endishilirini ipade qildi. Behreyin, men bir qanche aylardin béri dep kéliwatqan bu emeliyetni mu'eyyenleshtürdi."

Mayk pompéyo sözini yene mundaq dawam qildi: "Xitay kommunistik partiyesi tutqundiki Uyghur, qazaq, qirghiz we bashqa musulman milletlerge qarshi zor kölemlik kishilik hoquq depsendichiliki we zulum yürgüzüwatidu. Biz, behreyinning herikitidin memnun bolush bilen birge, barliq döletlerni bolupmu islam hemkarliq teshkilati we ereb döletliri birleshmisige eza döletlerni xitay kompartiyesining Uyghurlargha qiliwatqan zalimlarche heriketlirini, jümlidin ularning étiqadigha qiliwatqan hujumining bir qismi hésablinidighan yuqiridiki bu heriketlirini qattiq eyibleshke chaqirimiz". 

Behreyin xewer agéntliqining bildürüshiche, 2-yanwar küni behreyn dölet milliy mejlisining wekiller kéngishi, yeni mejlis töwen palatasi Uyghurlar heqqide bayanat élan qilghan. Ular bayanatta: "Wekiller kéngishi xitay hökümitining Uyghur musulmanlirigha qaratqan zor kölemlik tutqun herikiti, bir milyondin oshuq kishining lagérlargha qamilishi, ularning baliliri, ayalliri we a'ilisidin juda qilinishi, négizlik heqlirining ret qilinishi, qéyin-qistaq we ölümge duchar bolushtek insan qélipidin chiqqan, zalim siyasetlirige qarita chongqur endishe qilmaqta" déyilgen. Wekiller kéngishi bayanatida yene "Xelq'ara jem'iyetni mes'uliyetni ada qilip, Uyghur musulmanlirigha qaritilghan zulumni axirlashturush, ularni xelq'aradiki munasiwetlik qanunlargha asasen qoghdash, ularning xatirjem hayatini dawamlashturushini kapaletke ige qilish, xalighanche tutqun heriketlirining qayta yüz bermeslikige kapaletlik qilish" ni tekitligen. 

Aldinqi ay, kuweyt parlaméntining 27 neper parlamént ezasi kuweyt hökümitini xitaydiki Uyghur musulmanliri we hindistandiki musulmanlarning ehwaligha köngül bölüshke chaqirip imzaliq bayanat élan qilghanidi.

Toluq bet