Amérika tashqi ishlar ministiri pompéyoning Uyghur heqqidiki sözi xitayni qattiq bi'ar'am qildi

Muxbirimiz erkin
2019-12-30
Share

Amérika tashqi ishlar ministiri mayk pompéyoning Uyghur rayonidiki basturushni "Térrorluq bilen munasiwetsiz" dep élan qilishi xitay hökümitini qattiq bi'aram qilghan. Xitay tashqi ishlar ministirliqi 30‏-dékabir bayanat élan qilip, mayk pompéyoning sözlirini "Durus meqsetlik emes" dep tenqidligen.

Xitay hökümiti özining teshwiqatlirida "Kespiy terbiyelesh merkezliri" namidiki lagérlarning "Térrorluq" we "Esebiylik idiyelirini tügitip", Uyghur rayonida "Muqimliq berpa qilghanliqi" ni ilgiri sürüp kelgenidi. Lékin, amérika tashqi ishlar ministiri mayk pompéyo 28‏-dékabir élan qilghan Uyghurlar heqqidiki twéttir sözide, "Xitay kompartiyesining tibet we shinjangdiki basturush herikitining térrorluq bilen munasiwiti yoq. Kompartiyening herikiti öz musulman puqralirining diniy étiqadi we medeniyitini yoqitishqa urunishidur. Pütün eller diniy erkinlikni qoghdishi we uninggha hörmet qilishi kérek" dep tekitligen. 

Shu küni yene amérika tashqi ishlar ministirliqi twéttirda pikir bildürüp, mayk pompéyoning sözlirini qayta tekitligen. Tashqi ishlar ministirliqining twéttir bayanatida peqet shinjangla tilgha élin'ghanidi. Xitay tashqi ishlar ministirliqi bayanatchisi géng shu'ang 30‏-dékabir küni mayk pompéyogha qayturghan inkasida, xitay kompartiyesining az sanliq milletlerni basturiwatqanliqi heqqidiki sözler "Pütünley ighwa hem qarar chaplash, u emeliyetke uyghun kelmeydighan, durus meqsetlik sözler emes. Xitay terep buninggha qet'iy qarshi turidu" dégen. Mayk pompéyo yuqiriqi sözlerni xitay hökümiti Uyghur mesiliside keng kölemlik teshwiqat hujumi bashlighan, ilgiri lagérgha élip kétilgen Uyghurlarni taratqulargha chiqirip, özlirining "Kespiy terbiyelesh merkezliri" namidiki lagérlarni aqlawatqan mezgilde qilghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet