Amérika tashqi ishlar ministiri mayk pompéyoning ottura asiya ziyaritide Uyghur mesilisini otturigha qoyudighanliqi bildürüldi

Muxbirimiz erkin
2019-12-31
Share

Amérika tashqi ishlar ministirliqi 30‏-dékabir küni axbarat yighini ötküzüp, tashqi ishlar ministiri mayk pompéyoning sherqiy yawropa we ottura asiyadiki döletlerde élip baridighan ziyaritide Uyghur mesilisini otturigha qoyidighanliqini bildürdi. Mayk pompéyo 3‏-yanwardin 7-yanwarghiche bélorusiye, ukra'ina, qazaqistan we özbékistan qatarliq döletlerni ziyaret qilidu, shundaqla ottura asiyadiki 5 jumhuriyetning tashqi ishlar ministirliri bilen "5 Plus 1" yighini ötküzidu. Amérika diplomatlirining qeyt qilishiche, xitay hökümiti lagérdiki kursantlarning "Oqush" püttürgenlikini élan qilghan bolsimu, lékin amérika hökümiti "Bu rayonning weziyitide herqandaq bir körünerlik özgirish bolghanliqini körmigen."

30‏-Dékabir ötküzülgen axbarat yighinida tashqi ishlar ministirliqining bir emeldari: "Biz dunyadiki bizning shériklimiz, ittipaqdashlirimiz we biz bilen oxshash pikirdiki döletlerge Uyghur mesilisini dawamliq tekitleymiz" dégen. Bu emeldarning bildürüshiche, tashqi ishlar ministiri pompéyo xitay kishilik hoquq mesiliside alahide izchil iken. U, Uyghur mesilisining bu yil 9‏-aydiki b d t omumi yighini mezgilide ötküzülgen "5Plus 1" yighinida otturigha qoyulghanliqini bildürüp, "Biz ministirning pompéyo bu qétimqi sepiridiki ikki tereplimilik munasiwetlerde, shundaqla 5 plus 1 yighinida otturigha qoyudighanliqini küteleymiz" dégen. Mayk pompéyo bu qétim ziyaret qilidighan bélorusiye, özbékistan, qazaqistan qatarliqlar xitayning 3 milyondek Uyghur we bashqa musulmanlarni "Kespiy terbiyelesh" namida lagérlargha qamap, ulargha qarita ménge yuyush élip bérishini qollighan döletlerdur. Bularning ichidiki bélorusiye bu yil 10‏-ayda tajikistan, qirghizistan, özbékistan, türkmenistan, shimaliy koréye, süriye, kuba qatarliq 54 döletke wakaliten bayanat élan qilip, xitayning "Shinjangdiki térrorluqqa qarshi turush tirishchanliqi" ni qollaydighanliqini bildürgen. Buning aldida en'giliye bashchiliqidiki 24 gherb döliti bayanat élan qilip, xitayning Uyghur rayonidiki kishilik hoquq depsendichilikini eyibligenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet