“иттипақлиқ һәптиси” дә оттуз қазақ қолға елинған

Мухбиримиз әзиз
2017.12.18

Уйғурлар дияридики һәр дәриҗилик һөкүмәт тармақлири11-декабирдин башлап “қошмақ туғқанлишиш һәптилики” паалийитини кәң омумлаштуруватқан болуп, бу паалийәтниң мушу айниң ахириғичә давам қилидиғанлиқи ейтилған иди.

Мәлум болушичә, бу паалийәттә һәр дәриҗилик һөкүмәт хизмәтчилири күдә-көрписини көтүрүп йәрликтики кишиләрниң өйлиригә бериши һәмдә улар билән йемәк-ичмәк вә йүрүш-турушта биргә болуши тәләп қилинған. Һалбуки, “иттипақлиқ” ни күчәйтиш мәқситидики бу паалийәт башлинип һечқанчә өтмәйла аз дегәндиму оттуз қазақниң сиясий сәвәб билән қолға елинғанлиқи мәлум болди.

Радийомиз хитай бөлүминиң игилишичә, 16-декабир күни “қазақистанниң совет иттипақидин айрилип чиқип мустәқил болған хатирә күни” мунасивити билән қазақлар үндидар арқилиқ бир-биригә електронлуқ тәбрик картиси әвәткән. Шуниң билән үрүмчи вә көнәстә оттуз қазақ қолға елинған. Буларниң бәзилири “мустәқиллиқ күнигә мубарәк болсун!” дегән учурни йоллиғанлиқи яки шундақ учурларға “биргә болсун!” дәп җаваб қайтурғанлиқи үчүнла қолға елинған. Бу қетимқи қолға елиш вәқәсидин хәвәрдар кишиләр әһвал тонуштуруп қолға елинғанларниң асасән яшлар икәнликини билдүргән һәмдә уларниң исимлирини ейтип бәргән. Улар бу һәқтә сөз қилип “қолға елинғандин кейин уларни нәгә елип кәткәнлики һазирғичә намәлум” дегән.

Дуня уйғур қурултийиниң баянатчиси дилшат ришит бу һәқтә пикир қилип, һазир уйғурлар дияридики сиясий контроллуқниң уйғур вә қазақ пуқралиридин ешип, нөвәттә мәмурий хадимлар вә уйғур сақчиларғиму кеңәйгәнликини билдүргән. У бу һәқтә мәлумат берип “әң аддийси үрүмчи шәһәрлик сақчи идарисидә ишләйдиған уйғур сақчилар ишхана бинасиға кириштә қораллирини тапшуруп беридикән.

Сақчи идарисиниң ички қисмидики уқтурушта ейтилишичә, уйғур сақчилар сақчи идарисигә кирип-чиқишта бихәтәрлик тәкшүрүшидин өтүши шәрт икән. Әмма хитай сақчиларға бундақ тәләп қоюлмайдикән” дегән. Шундақла “иттипақлиқ”ни тәшәббус қиливатқан хитай һөкүмитиниң мушундақ васитиләр арқилиқ “иттипақлиқ” ни бузуватқанлиқини алаһидә тәкитлигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.