Uyghur aptonom rayonluq xelq qurultiyi yighinida “Milletler qelbdash bolush” tekitlen'gen

“Tengritagh tori” we “Shinjang géziti” torining 5-ayning 29-küni chiqarghan xewirige qarighanda,  Uyghur aptonom rayonluq xelq qurultiyi da'imiy komitéti yighin chaqirip, milletler ittipaqliqini yuqiri pellige kötürüsh, milletlerni öz'ara qelbdash bolushqa we bir-biri bilen yughurulushqa teshebbus qilishni muhakime qilghan.

Bu yighinda shi jinpingning “Jungxu'a milletliri ortaq éngini mustehkemlesh” dégen sho'ari qayta tekitlen'gen bolup, “Her millet japa we halawettimu, sherep we nomustimu, hayat we mamattimu birge bolush” dégenni teshebbus qilghan؛ buning üchün teshwiqat xizmitini yaxshi ishlesh,  “Doyin” qatarliq ijtima'iy alaqe wasitiliridin paydilinip, xitay medeniyitining séhriy küchini her milletke hés qildurush teklipi  bérilgen.

Nöwette xitayning milletler ittipaqliqi teshwiqati hökümet, xelq qurultiyi we siyasiy kéngesh yighinlirida dawamliq tekitlinip kéliwatqan bolup, Uyghur rayonidiki barliq idare- organlar, mektepler, teshwiqat bölümliri, ijtima'iy taratqular shi jinpingning “Barche milletler bir gewdige aylinish” idiyesini teshebbus qilmaqta iken.

Amérikadiki tunggan analizchi ma jü ependi bu heqte radiyomizgha qilghan sözide, atalmish “Jungxu'a milletliri ortaq gewdisi” dégenning emeliyette “Xitaygha qoshulup kétish” ikenlikini, 56 millet assimilatsiye bolup birla xitaygha aylan'ghanda, ularni bashqurushning téximu asan bolidighanliqini bildürgenidi.